*

upload_article_image

家族擁15億身家愛坐廉航 陳凱琳貼地過簡約生活

陳凱琳以慳妹打扮shopping。

資料圖片

日前,28歲人妻陳凱琳(Grace),撇下7個月大寶貝B仔鄭承悅(Rafael),飛咗去馬來西亞,孖好友陳敏之、高海寧等拍攝節目《仨心友行》。索媽Grace返港後,日前一連兩日獨自現身銅鑼灣。見本身屋企勁有米,卻訓練出慳妹本性嘅佢,兩日都喺銅鑼灣徒步經維園行返天后寓所,就算熱辣辣出晒汗都面不改容照行25分鐘,仲一口氣買幾個腸仔包做tea。嘉穎娶到個慳妹靚老婆,儲唔少奶粉錢啦!

網上圖片

22歲當選港姐冠軍,翌年做埋國際中華小姐冠軍,年輕貌美嘅陳凱琳早已萬千寵愛在一身,仲要有家底,娘家位於九龍塘、市值逾億元嘅獨立屋,有指家族坐擁15億身家!正所謂皇帝女唔憂嫁,偏偏Grace心急與現年50歲嘅鄭嘉穎結婚生仔,一於開行turbo,去年8月喺峇里開心出嫁後,今年2月火速誕下B仔Rafael。老公嘉穎嘅吸金能力亦唔低,但兩公婆接二連三被目擊坐廉航外遊,相當慳家!

呢日casual wear嘅佢由銅鑼灣鬧市散步返天后都無人認出。

日前下午4時,無化妝嘅陳凱琳一身casual wear襯個土豪金色名牌袋,現身銅鑼灣近皇室堡附近。見佢一邊聽歌、一邊啜住包果汁,輕鬆行入維園,再向天后寓所進發。雖然開始初秋,不過紫外線指數甚強,成30度高溫照頭曬住行廿幾分鐘,都咪話唔熱呀!行到寓所附近,Grace熟路走入麵包店,夾咗幾個每個售價$8嘅腸仔包做tea。然後喺銀包仔內摷出兩張廿蚊紙畀錢,其間與店員有講有笑,明顯係熟客仔。不過是日星媽低調出巡,完全無人認出,證明妝前妝後兩個樣喎!

慳妹仔喺銀包仔內,摷一張張摺埋咗嘅錢。

有指Grace兩公婆去年搬到天后,全因為校網好,嘉穎好想囝囝跟他一樣做「華仁仔」。

另一日,Grace同樣戴黑超戴帽冚星味,好悠閒拎住杯珍珠奶茶邊行邊飲,又係經維園行返天后寓所。其中最養眼莫過於人妻白衫透出bra邊,昔日被嘲係30A「最平港姐冠軍」,做媽咪後上圍三級跳啦!見佢仲打包一杯珍珠奶茶,唔通買畀老公嘉穎嘅?

Grace簡單白衫打扮。