*

upload_article_image

屋邨公園捕獲準新郎瀡滑梯 陳山聰陪姨甥女玩超有父愛

係愛呀!

陳山聰今年的43歲生日願望有二,一係劇集《金宵大廈》收得,二係結婚生女。11月1日(下周五)山聰就做「老襯」,雖然未見「雙喜臨門」,好彩恨做老竇恨到癲嘅佢,準老婆個妹家有得意囡囡芯芯。上周六(19日) 下午四時多,帶住黑超,一身潮人打扮嘅山聰帶住未來姨甥女去坪石公園遊樂場玩,潮山聰返老還童跟歲半嘅可愛芯芯玩足成粒鐘,玩晒搖搖船、瀡滑梯同盪鞦韆,難得山聰樂在其中,較芯芯更開心,而且陪細路女玩時,表現溫柔又細心,慈父feel湧晒出嚟,問鼎視帝前可以率先攞個「合格老竇」獎喎!

山聰攬實芯芯玩搖搖船,玩完一次仲會問小妹妹有無頭暈,好甜呀。

生得高大嘅山聰屈住個身陪芯芯玩瀡滑梯玩得好投入,而傭人姐姐亦在旁協助。

43歲陳山聰近日向前妻Ponny爆喊認錯,坦承對過去做過嘅事深表後悔,而山聰用了6年時間成功洗底,更憑著《金宵大廈》保安員「阿蕭」一角成為網民力推視帝。上周六,山聰偷閒帶住穿彩虹裙仔的未來姨甥女現身坪石公園遊樂場,作為潮人,山聰去遊樂場陪細路女玩都Keep住造型不能輸,帶黑超,穿爛牛,加埋戒指、頸鍊,星味超濃。現場有成50位大人同細路,山聰親切地跟街坊們逐個打招呼,亦有唔少細路仔粉絲大叫阿蕭哥哥,要求跟他合照,如迷你版影迷會。

玩足成粒鐘,山聰仲霸埋人哋阿媽角色拖住芯芯走。

當日同行的還有山聰準姨仔及傭人姐姐,卻未見未婚妻Apple。而山聰主力負責同芯芯玩,傭人姐姐從後支援,而準姨仔負責影相。43歲的山聰玩得相當投入,全程笑到四萬咁口,從後推鞦韆,又拖小朋友跑上跑落去瀡滑梯,玩搖搖船時配埋音發出BB玩樂聲,仲做埋搖擺肢體動作,玩到七情上面,加埋滿足笑容,好有愛。玩完一輪,他溫柔地問芯芯:「點呀,係咪好暈呀?嗱,你企喺度先。」跟住小心翼翼地扶小朋友企喺度,又抱她坐喺身邊再玩,慈父味飄晒出嚟。玩到夠皮,山聰仲搶住拖小朋友離開。其間有街坊見他玩得咁Happy,笑住叫他快啲生返個!他即答:「我都想。」

山聰雖然一直趕拍劇,但同芯芯玩完全唔覺攰仲笑得好開心。

對於被野生捕獲陪未來姨甥女去公園玩,山聰大笑說:「其實呢期忙緊拍新劇《大步走》好唔得閒,因為我好錫阿妹(芯芯),一得閒就同阿妹去玩,咁啱嗰日係假期,我又做完嘢,佢媽咪又得閒,咪車佢哋去玩囉。我唔介意喺屋邨公園蒲頭,藝人都係普通人啫,同小朋友去玩又唔係喺夜店玩。」對於有小朋友認得佢係「阿蕭」,佢答得輕鬆,「ok啦,我又冇乜所謂。」至於問點解同小朋友玩都要着得咁行?他笑說:「唔關事,因為晚上有約。」

山聰見到芯芯就冧晒,恨生女恨到流口水。

有小粉絲主動埋身求合照,仲真係叫得出「阿蕭哥哥」角色名㗎。

下周五結婚的山聰因為仲忙緊拍新劇《大步走》,所以未識緊張。對於姚子羚爆他恨生女恨到流晒口水,他說:「生仔生女都冇所謂,湊阿妹湊得多我鍾意女多啲,阿妹真係好得意,而且女仔嗲啲。」另外他亦透露Apple未有喜,所以大家唔使猜測,多謝大家關心。問到恨生女定恨攞視帝?他又大笑說:「唔係有冇信心問題,係仲未有資格攞獎,仲有好大好大進步空間,繼續努力啦。」依家的山聰如同《金宵大廈》結局一樣命運改變了,對此他說:「跑步令我改變,因為跑步令人變得好正面和開心,開心就自然一切都會好。」

山聰攬實芯芯玩搖搖船,玩完一次仲會問小妹妹有無頭暈,好甜呀。

山聰經常在社交網上載芯芯喺公園玩嘅相。