好多朋友支持！
賈思樂（Louie）將於下月12及13日在文化中心舉行《Me & My Girls in Concert 2019(part2)》，並邀得電視台過去及現在的六大花旦戚美珍、毛舜筠、向海嵐、陳秀雯、楊思琦及陳煒擔任嘉賓，除「三嫂」阿戚是Louie生命中的天使外，毛姐同陳秀雯亦好難請得到，而思琦妹大住個肚同他合唱亦非常難得！Louie笑說：「我從未同過大肚嘅女士喺台上表演，興奮同開心，知道佢有咗，我有小小忠告畀佢，就係唔好喺台上咁興奮，驚佢太開心時，唱唱吓個bb砵一聲生咗出嚟就好笑喇。」
早及後期的電視台六大花旦做賈思樂個唱嘉賓。
賈思樂好感激當年戚美珍患難見真情。
對於楊思琦秘婚及再做媽咪，賈思樂之前全不知情，早於7月9日影宣傳海報時，初孕的思琦著住由何國鉦設計的束腰Deep V紅裙，思琦身形還未見有異，加上思琦向來係有料之人，所以並唔察覺其胸部有懷孕的膨脹。直至最近聽到思琦喜訊，賈思樂興奮說：「真係好恭喜佢，佢話我腳頭旺佢，相信佢都旺我嘅，到時我同佢合唱張學友一首難度好高嘅英文歌，我一定會扶佢上落台，照顧周到。」
近年賈思樂愛周遊列國享受人生。
之前賈思樂為胡楓演唱會任嘉賓。
Louie坦言同思琦唔熟，「第一次見佢係佢出席一個活動，我做司儀，喺後台見佢好靜，我咪坐佢隔離同佢傾偈，後來知佢識唱歌，因為好少港姐自稱會唱歌所以對佢特別有印象。原先5月尾我搵佢時，佢話要返美國幫唔到我，後來又話好想同我合作而延期返美。」至於「三嫂」是Louie的大恩人：「佢唔會托我手踭，記得20年前離開電台，事業低潮時想出返嚟唱歌，因為資金有限要搵贊助，我就攞住演唱會海報去敲佢眼鏡舖頭門，硬住頭皮開口想佢贊助萬元金額，佢爽快答應仲開出雙倍數字話：『我畀多少少嚟鼓勵你，出返嚟唱歌要型同靚。』語畢攞咗幾盒眼鏡出嚟任我揀，我好眼淺，又食又拎感動到眼有淚光，後來佢仲買咗近百張門票嚟支持我。」阿戚指賈思樂人品好，非常抵錫。
