Quit社交網退下火線 黃秋生隊啤開心吹水

轉玩純英語社交網

三度獲封影帝嘅黃秋生，喺社交網誌好活躍，不時發表大膽言論，直腸直肚。但早前佢卻突然宣佈「棄玩」，坦言覺得好攰，跟大家說再見。其後，秋生火速轉玩純英語嘅社交網，感覺更自由同和平，一身安樂晒啦！日前晚上，呢位藝術家脾氣嘅影帝約咗男女友人去大坑飲酒gathering。見戴上牛仔帽嘅佢，吹水3小時好風騷，笑容滿面又手郁郁，似足開talk show。

秋生兩杯落肚好relax，談笑風生時笑得開懷。

見秋生滔滔不絕又動作多多，其間肉緊右手捉左手腕，似分析緊捉人情況喎！

集影帝、視帝、劇帝於一身嘅58歲黃秋生，早排同梁祖堯、徐天佑等演出舞台劇《尋常心》後，又為好朋友嘅《林海峰是但噏Happy Monday 2019》做特別嘉賓。在Encore嘅party環節上，見秋生脹咗成個碼、穿上金色西裝現身紅館舞台，化身「黃經理」聲嘶力竭大唱rock歌，又表演口風琴。尾場順利演出過後，Jan仲爆秋生第一次綵排後，細細聲跟佢講可以搞個演唱會，不過秋生聽罷即說已打消念頭，大呻唔容易。

近排發福不少嘅秋生，除帽後露出包包面。

8月尾，秋生撰長文以「我癐(攰)啦」為由唔再玩facebook。其後重返母校香港演藝學院嘅分享會時表示棄玩「是私人問題，是有點情緒」。

近日轉玩純英語社交網嘅秋生，坦言：「It's more freedom，peaceful and reasonable here(意指更自由及和平等)。」做人更輕鬆自在，平日一臉嚴肅嘅佢笑容自然多咗啦。日前晚上8時左右，見秋生戴上牛仔帽、英氣十足咁同女助手Moon、以及一男一女友人去大坑嘅酒吧happy hour。面向大街坐嘅秋生一邊隊啤；一邊happy吹水，唔經唔覺已暢飲幾杯。酒精落肚，秋生表現寧舍風騷，開始手郁郁，指手劃腳大動作傾偈，只見中女友人和長髮男友人不時點頭大笑，似乎好認同秋生說法。

秋生今年憑《淪落人》三度奪得金像獎最佳男主角，並帶動電影高收2千萬票房。

上月，秋生任林海峰talk show嘉賓，發福嘅佢一出場唱rock歌，掀起全晚高潮。

一行四人食吓小食歎啤酒，男女友人不時行出門外食煙叉電，但秋生3個鐘只食了兩支煙，煙癮明顯唔大。其間，秋生飲到面紅紅，要除帽散熱。直至11時許，眾人起身走人，有酒客趁機搵影帝合相，秋生都來者不拒，影完齊齊行去街頭搭的士，長髮男友人送秋生及兩女上車後再獨自離開。

秋生與中女友人及女助手同車離開。

George在《不赦之罪》飾演少年強姦犯，為演好角色，他換上一頭清爽短髮造型，卻被指似卡通人物monchhichi。

香港電影工作者總會推出的首季「總會拍電影」計劃，當中的第二部獲選作品《不赦之罪》，日前正式開鏡 。監製廖婉虹、導演林善、導演暨編劇譚善揚、黃秋生、蘇玉華、歐鎮灝（George@P1X3L）、陳紫萱及陳書昕五位主要演員都有出席開鏡儀式，電影圍繞三位人物，包括由秋生飾演的牧師，蘇玉華飾演的受害者母親，以及由George所演的少年強姦犯，幾位演員都讚賞劇本出色，不過笑言最初對林善及譚善揚首執導演筒非常擔心，幸而身為影帝的秋生，即場認可他們的表現。

《不赦之罪》日前正式開鏡。

（左起）陳紫萱、歐鎮灝、蘇玉華、黃秋生、陳書昕

秋生笑指大家擔心兩位新導演，全因被兩位青澀外表嚇怕，更即場派定心丸：「我又唔覺得佢哋好新，唔係咩都唔識咁，大家都溝通得非常好，又聰明又聽人講又可以消化得到好多意見，即係我唔駛好擔心所有嘢，係比想像中更好同順利。」蘇玉華就指開拍前曾跟兩位導演見面，印象深刻, 很難想像劇本竟然出自眼前兩位年青人：「今次的確係一個好好嘅劇本，呢兩個年青人好尊重我哋兩個老人家，佢哋真係每一場戲都會埋嚟同你傾，問呢場戲我會點樣處理，點樣演，我覺得係一個好真誠嘅合作。另外我覺得好慶幸，我同秋生一齊演啦，因為我哋好有默契，本身都係熟絡同一齊合作過。」

黃秋生、蘇玉華

譚善揚、蘇玉華、林善

兩位新導演亦都感謝秋生和蘇玉華前輩參與，譚善揚更指落筆寫劇本時，已經想住秋生飾演牧師角色，多得監製安排，最後夢想成真由影帝出演：「成件事好奇妙，而秋生佢上年都有完整睇晒成本聖經，佢有好多研究，我哋每日拍攝時候都會有很多討論，研究角色會有點樣嘅諗法。」至於林善對於自己剛從演藝學院畢業，就獲得執導長片機會，非常感恩並說：「我覺得『總會拍電影』計劃，對我嚟講最大嘅意義就係畀我一個本身讀電影學院，想拍電影想做導演嘅人一個實踐嘅機會，即係唔只係睇書或者睇電影裡面去學習咩叫做拍電影。」

譚善揚、林善

三位影壇後輩包括George、陳紫萱及陳書昕亦榮幸能夠跟秋生和蘇玉華同場演出，今次更是George首登大銀幕，面對前輩當然緊張：「我呢半年係有睇好多唔同嘅電影，吸收點樣做，諗住喺實踐嘅時候就發覺，咦，唔係噃，因為秋生哥有嘗試去幫我撇甩自己演出嘅框架，令到我每一晚返去，都諗返演出嘅每一場戲，個人好似對做戲通透咗。」紫萱曾經上過秋生的演技大師班，很開心再跟影帝碰面：「圍讀劇本時候再見到佢，其實並冇想像中咁惡，秋生哥都好調皮。」陳書昕亦珍惜今次與蘇玉華合演母女機會：「蘇老師真係好親切好nice，令到我更加容易入戲，對住佢就好自然有媽媽嘅感覺。」

陳書昕、陳紫萱、歐鎮灝

陳紫萱

為演好戲中釋囚角色，George換上一頭清爽短髮造型，更被指似卡通人物monchhichi，另外George又指將會與陳書昕有一場大膽戲，非常考驗演技，書昕指George為投入角色，即使在片場主動與對方溝通都被拒絕， George連忙澄清：「我個人比較屬於感受型（演員），所以我要好實在去feel角色的想法，就好多時會抦埋一二邊去諗嘢同埋去思考。」

歐鎮灝

《不赦之罪》是總會從40多份劇本中獲選中開拍，總會表示大部份首季「總會拍電影」的參賽劇本都以警匪或黑社會為主題，而《不》就與別不同，電影非簡單一部商業片，故事聚焦疫情之後，學生重新面對社會時，所遇到的個人或者群體問題，戲中探討當中產生的衝突，引發觀眾思考。「總會拍電影」計劃理念，旨在團結業內人士，更重要是為香港影圈提供更多不同類型劇本，從而發掘新題材，令香港電影更多元化。「總會拍電影」第二季收到超過 70個劇本申請，預計結果4月出爐。