港大學生會公民投票，結果200幾票之差決定退出學聯，學聯受到呢個重創後，最快的挑戰係嶺南大學學生會的公投。而呢個世紀決定造成的影響已經開始迅速在其他大專院校擴散。
圖片來源︰香港中大大學學生會退出學聯關注組facebook
中大和城大學生退出學聯的浪潮轉眼殺到。前日(周六)半夜時份在Facebook 出現一個新專頁，叫《香港中文大學學生會退出學聯關注組》，一睇就知佢哋立場。到咗今早，又有一個《香港城市大學學生會退出學聯關注組》的專頁在facebook出現，兩個專頁雖然新開，各自已有千幾個粉絲，睇嚟呢股退聯熱，會隨住天氣熱番而升溫啦。
圖片來源︰香港城市大學學生會退出學聯關注組facebook
學聯秘書長周永康今早上電台，佢認為港大學生會退聯對學聯有影響，但因為學聯本身係一個聯絡性質的組織，有重大決定都係幾大學生會經過諮詢同學討論的結果，將來學聯仲可以同港大學生會合作，港大學生會仲可以加入番學聯。
就學聯協調聯絡各大學生會呢個性質，現實上唔似發揮得好好。睇番佔中期間，學聯主導運動方向，好多決定都好快作出，好似當日同林鄭等政制三人組見到面，在回程後無幾耐就決定不會退場；又例如最後決定清場不反抗，變相退場等，係咪全部都經過同八大院校同學詳細討論呢？實質操作上，學聯好多決定，都唔單係一個聯絡性質的組織，而係自主決定。
另外周永康又話，回想港大學生的公投過程，上屆港大學生會會長梁麗幗保持中立，未有公投前表態反對退出學聯，令學生無所適從，係左右到今次的投票結果。
但政界人士對佢呢個說法有商榷的地方，今次的投票無疑係集合咗嫌學聯唔夠激同埋覺得學聯太激兩種相反睇法的學生，同樣支持退聯，但整體都係以激進的多數，假如梁麗幗等公開反對退聯，可能更加激發多啲不滿學聯在佔中期間的表現的學生出來投票，所以港大學生會唔公開反對似係經過考慮的行為。往後其他大學學生會即使表態反對退聯，亦唔一定有好結果。
學聯面對退聯風潮，現屆常委都相當弱勢，唔易有招拆局。
Ariel
** 博客文章文責自負,不代表本公司立場 **
