*

阿瑟王從來都係黑馬

工業界立法會議員林大輝拜年窒特首CY唔係新聞,佢講到特首人選先至係新聞。

話說大輝年廿九同記者食飯團年,出席老記爆料,大輝哥攞住舊年糕任影,話暗藏隱喻,祝特首CY羊年唔好再「高高在上」,要聽多啲民意,佢嘅民望就自然「升高」囉。

大輝哥展示完窒特首呢個指定動作,仲自爆心水特首候選人,當然唔係CY,亦唔係佢舊東家唐唐,更加唔係話明會參選的葉太,而係現任行會成員李國章。佢話「亞瑟王」國章哥係高質素人才,做過大學校長,又係醫生,最緊要做過行會、局長同問責官員,屋企有錢唔會利益輸送,各方各面都好好」。佢話阿瑟王另一個賣點,就係有份搞dbc數碼電台,有商業經驗,資本主義社會,就需要呢種人做特首,因為香港係自由經濟,政府唔應該好似宜家咁多干預,例如限奶令、港人港地等就唔係咁好。(講講吓又去番隊CY的老本行)

大輝哥話自從唐唐落選後,「李國章呢個名一直在心中,政界唔少人都覺得李國章係適合人選。」

Ariel亦真係聽過其他人講過,話特首候選人唔係只有CY、松松、曾主席、葉太,阿瑟王係高班馬,智力過人,唔聲唔聲,隨時去馬。話時話,大家都好似覺得個政改方案死梗咁樣,諗定選委會選舉會點啦。

Ariel

** 博客文章文責自負,不代表本公司立場 **