*

upload_article_image

快樂的Cult片 《茄哩啡事務所》即將上映

全部由零知名度的演員演出!

由日本新晉導演上田慎一郎執導的《屍殺片場》上年上映後,成功用指甲鉗鉗出一片熱帶雨林,以零卡士加超低成本製作,電影上映四個月贏盡口碑,在港亦大收800萬票房,創下恐怖影壇神話。導演有新作推出《茄哩啡事務所》(11月28日上映)繼續走「我睇咗啲乜嘢」路線,看這套戲是我這六個月以來,笑得最開懷的一次。

右邊係教主,唔講嘢嘅,左邊係教主嘅左右手,負責講嘢嘅。

《屍殺片場》製作成品只有300萬日圓 (約21萬港元)拍攝8日,總票房卻逾28億日圓(約1億9千6百萬港元)!而今次《茄哩啡事務所》開拍前,導演曾在全球舉行試鏡活動,反應超熱烈,最後在1500名參加者中選出15名零知名度的演員演出,再跟他們一起度劇本,達成真正的集體創作。

入會後派發指南,內有教主簡介,比翼雙飛動作加講埋幸福兩字用嚟打招呼。

《茄哩啡事務所》當然就是講老臨,但並非電影中在主角後面行行企企或一出場就被殺嗰種。一副驚青樣的男主角和人(大澤數人飾)有正職但好鍾意做演員,閒時周圍試鏡找機會,但奈何他一緊張同被男人追問就會暈低,咁死啦。多得細佬宏樹(河野宏紀飾),介紹阿哥去茄哩啡公司做嘢,公司乜Job都接,例如找人做媒入戲院瘋狂大笑,又或職業孝子,和人可以發揮所長同賺錢,後者好重要。有一日,公司接了一單踢爆邪教詐騙組織幸福丸的工作,和人兄弟被安排做前線深入虎穴,笑位多到癲,一講即穿橋,入場自己感受吓。

和人兄弟交咗入會費就成功加入幸福丸。

中間女仔係邪教會員,中邪毒太深,連父母剩落嘅旅館都畀埋教主。

和人兄弟前面嗰件物體係邪教嘅吉祥物,幾萬蚊港紙,話放佢喺屋企就唔會咁易頭暈。

幸福神石,會員家中必備,盛惠港紙400蚊一盒。

和人入咗去邪教新會員講座,性感職員埋身力Sell,好多男士成功被氹。

對於和人一緊張就暈,醫生話係心理病,無藥食全靠自己睇開啲。

《救命超人》係一套舊戲,和人隔幾日就睇一次,全靠佢排解寂寞。