*

upload_article_image

拍新劇演hehe情 譚俊彥指郭晉安好OK

會唔會戲假情真?

一段日子無拍劇的郭晉安在TVB新劇《失憶24小時》中好爆,因為佢會跟譚俊彥(Shaun)發展一段曖昧hehe情,兩人演對手戲,行徑唔只要乸乸地,連眼神都好有愛。Shaun直言好愛呢個前輩:「我哋係同類人,除咗都有一仔一女,仲堅持演員只要靠努力,唔要靠打關係。如果我真係『同志』,安仔梗係好OK啦,我鍾意睇內涵多啲過外表㗎。」

譚俊彥同安仔好對咀型,兩人係好好嘅演戲partner。

當日場口講Shaun覺得被出賣所以搵安仔算帳。

譚俊彥拍拍吓突然扯起件衫晒肌。

社會氣氛唔好,無綫監製王心慰開部喜劇《失憶24小時》等觀眾睇得開開心心,抹走緊張情緒。10年嚟冇拍過喜劇的Shaun就好有發揮,因為劇情說他對住安仔的情,被誤會有hehe成份。日前兩人喺觀塘和樂邨一間店鋪拍外景,劇情講Shaun以為被安仔出賣,因而去搵搬緊貨嘅安仔重組失去記憶,兼找他報復,安仔Hea住打發他走。

譚俊彥原來識搞笑

由於係喜劇,安仔表情都有啲浮誇,而曲髮造型的Shaun就好投入演出,陰聲細氣,手指指,唔覺唔覺竟然用蘭花手撥頭髮,好搞笑。連他都忍唔住話:「好多人睇住我演,評語係話『未見過你咁嘅樣喎,原來你係識搞笑嘅。』佢哋慢慢畀到我更多信心,等我可以再放開啲,畢竟之前5部劇都係好嚴肅,有套喜劇調節吓,輕輕鬆鬆都幾好,有10幾年冇做喜劇,今次搵返當日拍戲團火。」

拍到攰攰地,天氣又涼涼地,安仔突然有睡意放「蚊」。

因為係喜劇,安仔加入咗唔少搞笑元素引大家發笑,所以表情小小浮誇,有啲阿旺影子。

順利收工返歸湊仔

講到「好傾慕」的安仔,Shaun就讚不絕口:「佢真係一個好專業嘅演員,因為大家喺屋企都做晒功課,每日都拍得好順利,會有時間返屋企湊仔湊女。佢係一個最舒服嘅對手,同佢合作唔會有壓力,佢同我一樣唔喜歡應酬,安仔今日嘅成果全部都係靠努力得返嚟,我好欣賞佢呢樣嘢,至於想唔想學似佢咁做埋視帝?呢啲嘢隨緣啦。」

有街坊隨手拿來一張傳單向譚俊彥索取簽名。

安仔老婆歐倩怡近年相夫教子,好少喺幕前現身。

Shaun跟老婆任祉妍育有一子一女,唔使開工成日家庭樂。