*

搭上楊秀惠沈卓盈富貴舊愛 衛詩雅同新歡Ray甜爆行超市

真係恭喜你呀!

剛過35歲的影壇多產女星衛詩雅(Michelle)之前聲稱單身三年,仲話生日只係約朋友食飯。」答得隨意,其實今年Michelle生日一定好甜蜜,事關佢拍拖嘞。新歡麥偉汶(Ray)同娛圈都好有淵源,因為佢兩位前度都係娛圈中人,一個楊秀惠,一個沈卓盈,仲要兩位都已經係人妻兼嫁得非常好。日前傍晚七點,《頭條日報》發現,Michelle同Ray去銅鑼灣行超市買零食,新鮮情侶無拖手無攬錫,但男方對女方非常呵護,輕扶吓腰又摸吓手踭,兩人笑住揀零食又貼到好埋,恭喜你呀衛詩雅。

不時耳語 Ray好識氹Michelle開心,不時耳語氹得Michelle哈哈笑。

好多嘢傾 Ray負責推購物車,衛詩雅就負責發掘零食,全程兩人都好好傾。

今年9月,本報影到Michelle同大隻男行傢俬舖,兩人黐住睇電話疑似有嘢,事後Michelle面紅兼流汗否認,強調係朋友,仲話無機會發展,佢話,「依家會想睇定啲先,寧願揀一個啱嘅之後結婚,每次拍唔啱都係傷。」

好耐無見 自Ray同沈卓盈於16年分手後就無再喺娛樂版見過佢,無見三年,大隻咗好多,hi Ray。

接送離開 Michelle為咗避記者而先去停車場,之後再同Ray會合。

唔知Ray係咩人,但佢應該好識同女藝人相處,回帶去到2010年,當年楊秀惠承認同金融才俊Ray拍拖,到13年盛傳楊秀惠同沈卓盈爭仔,之後沈大師就同咗Ray拍拖,女方仲搬去男方價值億四嘅四千呎豪宅禮頓山同居,但拍咗兩年幾就分手,當年有新聞話兩人鬧交,Ray仲嬲到打爆咗架MINI嘅擋風玻璃。每個人都有過去,隔咗咁多年,Ray肥咗又穩重咗,同衛詩雅亦非常襯。

舊愛回顧 楊秀惠與Ray。

舊愛回顧 沈卓盈與Ray。

當晚七點,衛詩雅同Ray喺銅鑼灣時代廣場嘅超市玩兜圈,係呀,兩個人係咁喺零食區域兜嚟兜去,然後又去睇豆漿,又去睇水,留意返,兩人睇任何嘢都係貼住行,Michelle個笑容好甜,Ray又不時喺Michelle耳邊講嘢,眉梢眼角滲出甜味,明顯有嘢啦。兩人玩兜圈玩到忘我,突然間,Michelle發現記者,同Ray耳語一陣就閃先,剩返Ray找數,好大隻嘅Ray禮貌問記者屬邊間報館,然後再去停車場會合Michelle先一齊離開。

輕觸女方 Ray會輕扶Michelle條腰,又會捉住Michelle個手踭,有愛呀。

貼住揀嘢 無論揀水揀豆漿定揀零食,兩個都係黐住嘅。