*

孖麥包首帶師奶遊台灣 金剛擔心女友怕變師奶唔肯結婚

麥包曾提議金剛搞大女友個肚,咁就一定好「驚」喜啦!

麥包(麥長青)和金剛最近拍住主持ViuTV新節目《C9旅行團》,帶住班師奶玩轉台灣。他們讚首次跟ViuTV合作感覺比娘家TVB自由度更大,但未有擔心不能再現身娘家,還表示想仿傚黃淑儀遊走三個電視台;講到金剛有意下年迎娶台灣女友梁云菲,但當他得知女人婚後會變師奶後,即搞笑:「唔可以畀女友知,唔係唔肯結婚。」

帶住呢班師奶去旅行,麥包和金剛話比想像中好玩。

今次節目除了麥包和金剛,還有「廣告女皇」季軍蔡寶欣一齊主持。

麥包和金剛直言,知道拍檔是對方便好放心,麥包說:「大家熟有默契好多,有時搞gag都知對方底線同埋知道佢會接到嘛!」首次跟ViuTV合作好新鮮,麥包大讚自由度好大,「佢哋會叫你講咗先,唔得到時先剪,但TVB會顧慮好多,有時搞gag,譬如話個人好似金剛,但連金剛個名都唔講得,咁就冇咗個笑位啦!」問到會否怕難再返TVB,麥包就笑言:「未試過都想試吓!(但係黃淑儀可以遊走三個電視台呀!)我哋都想呀!」兩人更異口同聲話非常歡迎邀請,仲大玩食字話:「嚟!樂意呀!」

麥包和金剛話任何電視台邀請,只要工作合適都想合作。

講到今次同班師奶一齊去旅行,麥包話她們比想像中大膽,「我哋專登搵啲好刺激嘅嘢畀佢哋玩,點知佢哋完全唔驚,想挑撥佢哋鬧交又唔成功,所以下次想公開招募全素人參加者,應該會好玩啲。」金剛又提議下次可帶母女同行嘅旅行團,幫手解決家庭問題做和事佬,「最好去馬爾代夫拍,大家着住泳衣應該會好正。」

想挑釁班師奶,麥包和金剛專登安排一班台灣索女浸溫泉,結果都係唔成功。

講到金剛有計劃明年跟女友成婚,但女友要求求婚要驚喜到喊,麥包曾提議他搞大女友個肚,問到金剛會否採用,他即笑言:「佢睇到驗孕棒嗰兩條紅線,一定好驚!」講到到時女友夠資格參加《C9旅行團》,金剛才知結了婚就變師奶,他即搞笑:「一定唔可以畀女友知咁解,唔係佢一定唔肯結婚。」

金剛跟台灣模特兒女友梁云菲,已有計劃明年結婚。