兩會喺北京召開，中央港澳工作協調小組組長張德江對港澳政協委員發言，提到澳門時講到三點希望同兩個硬任務，三點希望就比較大路啲，香港澳門都通用，包括全面準確理解一國兩制、基本法、發展經濟改善民生，以及遇事有商有量咁。
我就覺得兩個硬任務雖然唔可以話係新，但就突出中央要求澳門做嘅事情。第一係經濟多元化，第二就係青少年教育。記住阿爺話係硬任務，意思就係必定要做得成，無轉圜餘地，唔好諗住有得講價。
兩個硬任務，一個經濟、一個政治，經濟多元化已經提到好高的高度，原因係如果澳門過度偏向博彩業，經濟發展將不可持續，阿爺雖然無講到出口，但佢已有清晰政策，唔會任由大量資金流失到澳門。據一啲內部評估，過去高峰期每年有八千億人民幣，喺明喺暗的渠道流向澳門。
如果只流向博彩業而言，由於一半賭收流入外資之手，即係話流出去的錢，有一半係俾外國賺咗。你話阿爺會唔會容許呢個情況繼續落去？甚至容許流出的錢愈來愈多呢？
既然阿爺打貪打得咁劇烈，本身已經影響到流向澳門賭博的資金，再加上阿爺睇住啲錢嘅流動性嚟管理，恐怕澳門如果單純仰賴博彩收入，呢個增長方式將不可持續，所以阿爺多方鼓勵澳門要搞多元化經濟發展。
另外就係青少年教育，呢樣嘢係政治性，不論澳門抑或香港的情況都說明咗，搞青少年愛國主義教育刻不容緩，澳門舊年的「離保法」風波，搞到大批市民上街，網上反對政府聲音強烈，澳門之後到香港佔中，更加有幾十萬人佔領街頭。阿爺唔想今天香港的情況，明天蔓延到澳門，阿爺對香港情況的總結，主要係無搞好國民教育，青少年愛國心不強，既然如此，梗係唔希望澳門出現相同情況，所以搞好青少年愛國主義教育可能係澳門未來重點課題。
澳門各界人士睇住阿爺打「開口牌」，講出兩個硬任務，大家就要識執生，避重就輕，順住國家政策做事，就會得到更好結果。
李望風
** 博客文章文責自負,不代表本公司立場 **
