*

老婆肝腎腫瘤縮細2cm 林子博帶家人車公廟還神

祝Shirley早日康復!

48歲林子博去年一波多折,4月時太太董燕君(Shirley)確診患上罕見的平滑肌肉瘤(腹腔)第四期,需要錢時卻被TVB請食「無情雞」,沒有工作兼要籌錢醫病,好徬徨,幸得古天樂等圈中人伸手援助度過經濟難關。不過,禍不單行,子博年尾又在紅隧炒電單車,好彩只是損手爛腳,不夠部車傷得重!咬緊牙關陪伴愛妻打了大半年硬仗,2020年頭終於報喜,子博說:「經過中西合璧及其他治療,太太最新嘅檢查報告顯示原發性腹腔腫瘤及擴散開去嘅肝同腎腫瘤同樣縮細咗2cm,最重要活躍程度降低咗,進展良好,總算鬆一口氣。」

去年4月開始子博陪住老婆打硬仗。

古天樂都好關心林子博的家庭狀況。

子博話喺新嘅一年會聽晒老婆話,因為上次唔聽講,就發生炒車意外!

子博趁住豬年年尾的大吉日,帶上老婆及10歲兒子卓楠去了車公廟還神兼轉運,為免迫親患病太太,他隻身去買香燭、還神衣紙,還擠入善信堆簽香油,然後再拖手帶領家人上香,轉風車及敲鼓,而卓楠趁爸爸行開會幫手看實媽咪,一家人好溫馨。

一家三口去車公廟誠心還神,阿囡因為要返學去唔到。

Shirley被老公、囝囝拖到實去還神,一家三口好有愛。

至於帶了帽及假髮,執了個靚樣的Shirley狀態大勇,行動敏捷及精神飽滿,明顯肥返點。一家人誠心上香還神,希望鼠年一切安好,子博說:「我冇貪心求財運,只期望一家人齊齊整整,健健康康,我屬豬,喺豬年犯太歲,就當如發咗場惡夢,希望還咗神可以心安理得,往後日子好事齊來。」一臉童真的卓楠則說:「我只想學業進步,媽咪好返。」

Shirley被老公、囝囝拖到實去還神,一家三口好有愛。

雖然太太進展良好,癌細胞縮細了,而轉移的癌細胞都消失了,報告令人滿意,但子博仍未敢鬆懈,希望太太keep住有進步:「暫時完晒化療,太太可以休息吓,集中火力中醫及其他療程,今年3月會再去醫院照電腦掃描,再決定下一步治療方法,睇吓會否採納醫生建議做電療,了解吓電療效用有幾多。」

子博陪住妻兒轉風車,望新一年轉個好運。

子博教卓楠輕敲鼓三吓,以示神明。

另外,子博亦打消去美國求醫的計劃,「因為院方話根據基因測試,暫時未有合適配對,既然冇就做家可以做到嘅嘢。」回復笑容的Shirley說:「完成晒化療,休息咗一排後開始有返啲力氣,對腳冇咁易攰,行起路嚟都冇咁氣促,之前趕去睇《除夕倒數詠香江》曾失重心搞到拗柴,好彩及時扶得住,否則就跌親。」

子博迫入人堆簽香油,太太在身後等候。

Shirley病情轉好,一家人面上回復了笑容。

問到做緊Part time的子博的經濟情況,他無奈說:「暫時都冇得諗,始終太太康復之路好漫長,家我要多啲時間照顧家人,時間上未必做到正職。啱啱先客串完ViuTV劇《地產仔》同埋拍咗套網劇,亦最想嘗試拍電影。」稚子不覺意爆料:「媽咪想爸爸搵古生,但爸爸唔肯!」子博即更正:「古生係你叫嘅咩?如果有得做,爸爸乜都去做!」豈料卓楠卻說:「爸爸又唔去做洗碗同保安,可以賺到好多錢㗎,我志願係做洗碗同埋煮飯,賣珍珠奶茶,咁就可以畀到錢爸爸、媽媽,自己又會有好多儲蓄,同埋買到樓喇!」Shirley見兒子的孝心,笑得開懷:「其實佢同姐姐都好錫爸爸,好擔心爸爸冇工做,冇錢唔知點算好,見樓下請保安,月薪$16800,另有個姐姐去咗做洗碗,月入二萬,所以佢就有咁單純嘅諗法,好搞笑。」

1月8日係董燕君生日,當天一家四口出外食飯慶祝,子博冧妻留言:「林太生日快樂~老婆,一定要身體健康!錫晒你!聽聽話話抗病,想游(遊)山玩水我天涯海角都陪你去!」

Shirley生日願望只求健康,同埋最愛佢嘅人陪伴就夠,不需要大排筵席同名貴禮物。