*

upload_article_image

俾點耐性等中海油

生逢亂世,一場瘟疫,將港股由高位一下直打落嚟,大市插近26000點邊緣。之前在旺市買入博短炒的股份,應該已在輸10%的水位打靶。短炒就係咁,守止蝕好一點。

按道理未來有機跌穿26,000點,之後港股進入價值區域,好多股份從市盈率和派息的角度睇,都比較吸引,長線投資者可以酌情吸納。不過呢一浪身形冠狀病毒流感的疫情,未必那麼快會消退,想買貨而有耐性,要等再跌低啲,先至好郁手。

有人問見到咁樣疫情,買乜嘢股份穩陣啲?我就話如果大市連25,000點低位都穿埋,買乜嘢股份都唔會太穩陣,不過如果買一啲大股,特別之前都跌得比較深的股份,再大跌的空間會細少少,例如中海油( 0883 )。

圖:中海油一年圖。

中海油一年圖。

中海油一年股價高位15.14元,低位10.74元,週四收12元,距離一年低位尚有一成左右。中海油現市盈率8.9倍,息率6.1厘,開始進入比較吸引的價位,可以俾啲耐性,等中海油跌到11元左右,才開始吸納,希望在接近全年低位買貨。

紐約期油一年圖。

紐約期油一年圖。

中海油集中做上游業務,和油價的相關性很大,因為中國的疫情,油價近日急跌,紐約期油現價53.24美元,非常貼近去年8月做的51.09美元的全年低位,如果假設疫情總會過去,油價經過這一輪急跌尋底之後,將會回升,今年全年油價仍然在51至66美元中間浮沉,那麼買入中海油,甚至可以收埋息,然後再博股價上升。

陸羽仁

** 博客文章文責自負,不代表本公司立場 **