*

買到亞視都未必咁易用到山頭發射站

亞視六點新聞突然宣布,公司接到股東黃炳均及主要投資者王征通知,決定接受香港電視主席王維基的主要條件,出售亞視控股權。仲話黃炳均及王征將豁免亞視所欠大部分債務,而有關交易尚需得到法庭同意,及報通訊局批准。

 

呢單新聞都算爆,令亞視又再成為熱話。到寫稿呢一刻,港視仲未有回應。

 

有電視業界高人就話,事態發展都幾有趣,維基哥買亞視唔知條數係咪已經計清楚,之前通訊局已經建議唔續牌俾亞視,又搞咗咁多單欠薪事件,係咪一換老闆,政府就即刻轉態呢?

 

業界知情者話仲有條大數,唔知維基哥有冇預到,之前幾個月亞視鬧出糧荒,個個月係咁拖糧,後來搞吓搞吓又出到糧,背後無綫都有發功,除咗向亞視買咗700套黑白粵語長片同幾千小時的劇集(主要係當年受歡迎的武俠片)外,仲買埋亞視唔少儀器同器材,聞說過去幾個月,計計埋埋亞視都有成幾千萬收入係來自賣嘢俾無綫。

 

其中最值得注意係,亞視賣的資產中,原來包括依家用作轉播同發射訊號的多個山頭上的器材,例如天線、發射器。當年轉用數碼廣播,政府在山頭借啲土地出來,俾兩間免費電視台起發射塔,無綫同亞視有協議,各自負責在不同的山頭上起發射站兼提供埋器材,然後共用所有發射站來做轉播,起的時候亞視已拖欠資金,無綫為咗快啲可以用,已經借咗約2000萬俾亞視。最近幾個月因為亞視缺水,原來已經將呢啲山頭上的儀器賣咗俾無綫以換錢出糧。

 

業界高人估計,以無綫同維基哥的恩怨,維基如果真係買亞視,無綫都好大機會即係叫還債,呢啲都事小,有錢可以解決。但山頭儀器賣咗俾無綫就濕滯啦,依家無事無幹,無綫就俾亞視繼續用山頭上的器材作廣播。如果轉手俾維基哥,幾乎肯定無綫會即刻同你計清楚。就好似之前都試過維基哥買咗中移動子公司的流動電視牌,無綫即刻出信話中止之前租用山頭轉發站的合約,再慢慢傾過條件啦。

 

淨係呢關,維基哥都可能好頭痕,無呢啲山頭做發射站,都唔知點廣播,但依家山頭上的儀器已經賣晒俾對手,有排拆招啦。所以維基哥如果真係落實買亞視,前景都唔係咁清楚,小股民想入市博佢炒上,都係小心啲喎。

 

Ariel

** 博客文章文責自負,不代表本公司立場 **