*

母子逛超市 新手媽李蕙敏無幫囝囝戴口罩

唔知係小朋唔鐘意無兒童口罩,要帶小朋友出街唔應該咁無庶無掩!

年尾便踏入五字頭的李蕙敏(Amanda),於2013年下嫁英籍老公Serge Micallef,二人結婚六年多,一直努力造人不成功,奈何試過兩次人工受孕均失敗,最終她都決定領養小朋友,直至去年10月,Amanda正式宣布圓夢做媽咪,成功收養一歲多的兒子Michael!

跟老公均是「10月壽星」的Amanda,去年10月宣佈領養B仔Michael,並指囝囝是夫婦倆最好的禮物。

升呢人母後,Amanda都冧滋滋表示:「Michael係最好嘅禮物。」還爆囝囝好活潑又鍾意周圍走,所以不時要帶對方落街「放電」,令同時要工作及湊仔的她也直言頗攰,但即使請了工人姐姐幫手,但她凡事都親力親為,自己抱、自己湊,絕對是一個好媽媽!

一家三口首度過聖誕,萬千寵愛在一身的Michael亦收到唔少禮物,Amanda指圖中有一半都是BB的。

農曆新年期間,從美國登台回港的Amanda都好關心新冠肺炎的疫情,不單止特意為市民健康去點燈祈福,還不時於Instagram留言同大家打氣,早前見全港市民盲搶廁紙,她都出Po呼籲:「勿驚,超市好多貨。」

Amanda年初一在美國登台,雖然人在外地,但她仍密切留意本港肺炎疫情。

日前下午,Amanda則現身數碼港超市,同行還帶同囝囝和工人姐姐,不過此趟並非去撲廁紙、消毒或清潔用品,而是買了少量即食麵、罐頭、肉類等。當日,戴上Cap帽、掛上毛毛頸巾的Amanda,手執一杯似是蘋果汁的飲品,儼如貴婦般帶住工人姐姐於店內漫遊,二人都戴了口罩防疫,惟細心一看,悶到在BB車上腳揈揈的Michael,竟然無遮無掩,任由脹卜卜面珠仔外露!

當日Amanda都好低調,刻意將頂帽拉到勁低,連記者都差啲認佢唔到。

Amanda帶埋囝囝、工人姐姐去超市買嘢食,兩位大人都戴晒口罩防疫。

雖說一般長者、長期病患與肥胖人士較高危,但早前也有出生僅一個月大的女嬰中招,加上BB的抵抗力比較弱,面對傳染力極強的「超級病毒」新冠肺炎,父母們都不應忽視。未知是新手媽咪粗心大意,抑或兒童口罩嚴重缺貨,但怎樣都好,都要用成人口罩或車蓬擋一擋,見Michael還擘大個口打「喊露」,非常危險!

新冠肺炎大爆發,萌爆Michael仔卻全程冇戴口罩,仲要口擘擘打「喊露」!

不過,不得不提,Amanda真的非常愛錫囝囝,付款後,二人便Call車返屋企,其間即使工人姐姐在旁,她都絕不假手於人,獨力推BB車,又抱Michael上的士,事事親力親為。

買完嘢,Amanda拖實1歲多的養子Michael去搭的士,工人姐姐就幫手收車仔。

行到街口準備上車,工人姐姐幫手抱BB落地,旁邊街坊見到萌B即刻舉機影。

Amanda抱Michael仔上的士前,將手中杯嘢飲遞給司機,對方都好樂意幫手拎住。