*

upload_article_image

財爺派一萬元 工聯會鄧家彪轉捐公益金 TAG林鄭及司長跟隨

財爺今天宣布派1萬元予18歳以上香港永久居民,人人有份,大家開心。不過,亦有人質疑不分收入去派,高官富豪都可以攞1萬,不符善用資源的原則喎。

高人話,上次政府派4000元時就是考慮這些因素,一人提一個意見,定出各種條件,條件多審批時間自然長,搞到一年幾先至派得出去,俾人鬧爆「政府派錢都派得衰過人」,所以今次財爺學精咗,18歲以上人人派1萬,無乜條件,就會派得快好多。

政府派錢,惹來各種反應。工聯會鄧家彪在facebook上出咗個貼子,都幾有趣!佢個貼一開始就問:「捐出一萬 齊心抗疫 高官,你呢?」

原來阿彪覺得財爺終於落實派錢一萬,而目前疫情嚴峻,百業蕭條,各業經營困難;打工仔女無工開,飯碗不保,可以話手停口停。

佢話留意到公益金及時雨基金為疫情下的失業家庭作緊急現金支援,於是決定捐出一萬,與失業家庭,共渡難關。佢仲特別邀請特首林鄭月娥及三位司長包括張建宗、陳茂波及鄭若驊一起捐出一萬元,為失業家庭做一點事。

鄧家彪向公益金捐款

阿彪仲上載埋CAP圖,自己已能率先捐咗一萬元予公益金,不知林鄭及波哥等會否接招呢?!

Ariel

** 博客文章文責自負,不代表本公司立場 **