七七到七八一年之間,個人到過海洋公園最少五十二次。因為開園未幾,為了廣為宣傳,園方邀請電台每周在園區舉行流行音樂活動,為期一年。我被委為監製,當年每周日都在園內渡過,留下不少腳毛。當年全港紅歌星,幾乎都曾在園內獻唱。時光飛逝,早幾天局長與園方大員公佈最新的鴻圖大計,幾個講者不約而同都話:「好高興有機會為市民介紹海洋公園的最新計劃…」。心下一沉,原來都是語言偽術最高境界,公園已經蝕到入肉見到骨,力推救亡大計而已,正是喜從何來?

海洋公園會否成為香港人的集體回憶?

過去多年,個人不斷指出,海洋公園及廸士尼都是黑洞,政府再投放金錢,只會將應否拔喉問題延後,容讓今天該下的決定,由後人來擔承。早晚要引刀成一快。今回建議,大眾着眼點,係未來可否反彈到750萬入場人次。我反問:到數又如何?大話怕計數,入園高峰770萬人次,於12至13年創下,當年全年收入19億,人均247元,是當年280元門票的八八折。當中還包含了餐飲及紀念品銷售,連標準入場費都未收足已經係大問題。海洋公園去年入場人次580萬,全園收入17億,人均消費293元。是門券480元的六折左右。問題明顯在於,如果不能夠提高人均消費,即使成功吸引到750萬人次進場,也是一盤蝕本生意。

要公園起死回生?辦法唔係冇?套用近日流行用語,自己公園自己救!七百萬港人,每人生日當天入園消費500蚊,已經有35億,香港人自己玩哂,完全不用乞求外來遊客!但是否人人樂意及有能力咁做,身體最誠實。廣東人有句老話:「冇咁大個頭,唔好戴咁大頂帽。」放在面前的是,有人做定頂大帽,等個大頭出現,可惜未等到個大頭,香港已經頭都大埋。唉…咪玩喇。