《法證》收視獲好成績 湯洛雯感動到喊

「努力冇白費，係好窩心！」

湯洛雯去年臨時頂替黃心穎演出《法證先鋒IV》的記者「徐意」，更要極速用一個月補拍全部戲份，她坦承當時壓力真係超級大，冇得瞓又食唔到嘢，一樣減唔到磅肥住拍。現在劇集首周7天跨平台總收視35.7點，有好成績靚湯當然興奮，睇到網友評價，更令她覺得努力沒白費，訪問時愈講愈感動搞到想喊，佢話經歷過這次覺得自己升咗呢，以後演出上有更大挑戰都唔會驚。

提到努力獲得網友認同，靚湯忍唔住哽咽。

靚湯自爆原來最初唔敢睇該劇，因好驚自己演得唔好，反而是網友在她社交平台留言，才令她放心去睇，「第一集我係唔敢睇，驚自己做唔好，後尾啲網友留言話OK，我先夠膽去睇。」她又感激網友給予好多正面評價，「好多話我演得好自然，話我進步咗好多，叫我加油努力，係啲好簡單正面嘅鼓勵，但呢啲每個鼓勵我都有睇，每個鼓勵都入咗心，因為拍嗰陣（忍唔住哽咽）有啲辛苦嘅，網民真係感受到你有努力過，努力冇白費，係好窩心！」

受疫情影響，靚湯透露主演的古裝新劇《一笑渡凡間》都要延期開拍。

感激黃浩然相助

回想拍攝過程，靚湯亦認為是自己入行以來最大考驗，「今次要突然之間入劇組，要同佢哋好熟絡，但佢哋已經演過一次，其實嗰陣係硬住頭皮，因為我係第一次同（黃）浩然同阿Shaun（譚俊彥）合作，好驚搞到佢哋NG，所以壓力好大。另外，監製落咗命令要減肥，拍緊時休息時間已經冇乜，再加埋又要減肥，再加埋個劇本係要一字不漏背啦！好似日日大考咁，嗰時壓力係入行以嚟最大。」

角色「徐意」拼搏一面，靚湯覺得同自己最相似。

劇中靚湯和黃浩然對手戲最多，對方更經常提點她。

不過，成功跨過這難關，令靚湯信心大增，「拍完之後自己好似速成班，覺得自己好似跳咗級，我可以接受啲更高嘅挑戰。」靚湯又話要特別多謝黃浩然這個好拍檔，「我哋台灣出外景前，其實佢已經去過一次，之前佢同小青姐（監製）話同阿湯圍讀多次，等去到台灣得心應手啲，佢要專登返嚟幫我圍讀，大家都真係好錫我。」

靚湯大讚譚俊彥拍攝時為幫她放鬆，經常講爛gag。

上月初靚湯跟家人、高海寧和朋友去日本玩，當地疫情還未嚴重。

靚湯心痛愛貓！

湯洛雯（靚湯）與馬國明結婚後，雖然二人未生小朋友，不過他們當一對愛貓Tino同Ariel是心肝寶貝一樣，十分疼愛。昨晚（3月19日）靚湯在IG上載其中一隻愛貓打完疫苗後出現異常反應，令她非常擔心，心痛到眼淚狂飆，還提醒大家帶毛孩去打疫苗時，一定要小心觀察打完之後的反應。

湯洛雯與馬國明當兩隻愛貓是心肝寶貝一樣。

愛貓打完疫苗後出異常反應。

靚湯說：「大家帶毛孩去打疫苗時候，一定要小心觀察打完之後嘅反應！今日帶大仔去打疫苗，以前打都冇事最多係攰啲，但係今日返到屋企，見佢一開始少少肚痾，跟住鼻哥好紅，再見到佢眼腫晒，之後呼吸極快，我真係嚇到癲咗即刻帶返佢去診所，打抗敏針同止嘔針，瞓氧氣箱，個心痛到啲眼淚狂飆。」她續指幸好半小時後情況舒緩「依家帶咗返屋企，好攰好攰，係咁瞓覺，都放心返啲醫生話極少數會有咁嘅反應，不過咁啱就係嗰個極少數佢仲話好彩我哋快帶佢去，如果唔係後果都有危險…………大家有冇試過啲咁嘅情況？」

靚湯心痛得狂飆淚！

隨後，靚湯感謝大家的留言，並指愛貓情況已穩定：「多謝大家嘅留言，原來大家都試過有咁嘅情況，真係好恐怖，第時都真係要考慮係咪真係要繼續打，太驚嚇。Update返，見佢睡姿回復正常，應該舒服返好多。」

靚湯叫大家帶毛孩打完疫苗後， 一定要留意牠們情況。

指愛貓情況已穩定。