準備迎接新生命。
羅力威為餵夜奶接受特訓。
羅力威日前接受香港開電視節目《開工大吉77》訪問，除了宣傳新歌外，更難得開腔講「家事」：「我哋好快做父母喇，我會安排更多時間去照顧太太，我應該會去學煮餸，其實我都好有信心去照顧BB，因為我當養貓咁養，有晒經驗！之前貓貓病咗，我瞓身去餵藥、餵糧，我相信對BB都一樣，會盡我所能去照顧佢。」
羅力威與雨僑就快做爸媽。
羅力威仲話為餵夜奶，已開始接受「特別習訓」：「近排屋企有隻貓半夜喺度喵，我就當體驗未來BB唔瞓要點做。我同太太有共同價值觀，最緊要係令小朋友開心成長，希望我做到一個稱職的爸爸。」
講到新歌MV，羅力威就話MV暗藏彩蛋：「我唱呢首歌唔係諗住太太去唱，成個Feel好似係扮直播感覺，其實當中好多出現嘅人名，都係我嚟緊嘅歌名，所以都好佩服導演呢個概念。」
