大家加油！
比起搞笑，Bob給的正能量更令人感動。
林盛斌（Bob）不止愛誇張搞笑，在今個疫情下，他經常發放正能量。今日他就為失業人士提供3個選擇：搵工、開公司做生意、進修搵新出路，內容很有建設性很正經，很有心打很長的一篇文，所以網民紛紛給他讚。
Bob一家六口超有愛。
Bob說：「呢三個選擇，試吓，做吓，都可能會有轉機，但係，乜都唔試，乜都唔做，就肯定收皮！」、「我估我呢一刻面對緊嘅問題唔會比你少，唔好再嘥時間、嘥心機去埋怨呢樣嗰樣，亦唔好期望個社會有咩政策措施會幫到你。」、「自己條路，自己掌控；自己嘅人生，自己救！」、「疫情，逆境，總會過去，只係需要d（啲）時間，記住，個市停，個人GDP絕對唔可以停。」、「各位，堅強，努力，加油！」
資料圖片
網上圖片
全文如下：
睇完一個新聞節目講到香港嘅經濟情況，
報導最近所有旺區嘅鋪頭接近九成冇開，
中環、灣仔、銅鑼灣、尖沙咀、旺角，
全部黑媽媽，條條街都係小貓三四隻甚至冇人，
未來呢段時間，我相信，真係會有好多人會失業。
如果你最近失去咗工作，其實你有三個選擇：
1）馬上去搵工
我知可能而家會比較困難去搵份工，但係唔緊要，
難啫，唔代表冇，仍然有公司係需要發掘人材，
不過可能你要做一d唔係你之前做開嘅嘢，
又或者可能要做一份冇之前咁好收入嘅工作，
冇所謂啦，馬死落地行，做住先啦朋友，
可能因為咁而發現到自己一直冇為意嘅才能，
之後越做越好，遲d搵得仲多呢，
點都好過日日坐喺屋企度玩手指吖！
2）開公司自己做生意
我知你會話：吓？有X錢呀？
其實做生意唔一定要用你好多錢，
只要你有一個唔係人人都有嘅專長同技術，
而個市場係有需要呢種服務嘅就可以，
例如你係一個專業嘅平面設計師，
你去公司註冊處俾兩三千蚊開間公司，
跟住開一個社交平台例如 Facebook IG 嗰d，
然後將自己之前設計過嘅所有作品放上去，
再用你部電話拍片去話俾人知點解你會咁設計，
個logo想表達乜嘢，點解個構圖係咁等等，
又或者教授一d基本嘅設計技巧同技術，
用盡一切方法去為你嘅follow帶嚟價值，
最後叫大家有需要搵人做設計可以PM你。
有需求，有供應，呢個，已經係一個生意。
3）將你嘅興趣進修，然後再搵出路
每個人都會有令自己提起勁嘅興趣，
假設你最鐘意打籃球，以前又校隊又盛咁，
一直都有打，仲要係打得唔錯嗰班，
你可以襯呢個時候去操fit自己同進修一下，
上網又好睇書又好，去學吓點做一個籃球教練，
然後將你嘅履歷寄去全港所有中小學社區中心嗰d，
話俾佢哋知你雖然冇乜經驗但係好有heart，
好有火，兼收費非常貼地（呢個好重要），
我相信衰極都總有三兩間會搵你試吓呀嘛！
呢三個選擇，試吓，做吓，都可能會有轉機，
但係，乜都唔試，乜都唔做，就肯定收皮！
你，會點揀？
我估我呢一刻面對緊嘅問題唔會比你少，
唔好再嘥時間、嘥心機去埋怨呢樣嗰樣，
亦唔好期望個社會有咩政策措施會幫到你。
自己條路，自己掌控；
自己嘅人生，自己救！
疫情，逆境，總會過去，只係需要d時間，
記住，個市停，個人 GDP 絕對唔可以停。
各位，堅強，努力，加油！
4大嘉賓鬥數「襟撈」三大型男當中一人更是國際級知名人士！
清談節目《MORAZ天然草本驅蚊靈呈獻：Mayanne小喇叭》由麥美恩（Mayanne）擔任主持，曾展望（GM）擔任助理主持，19日10點半翡翠台播映最後一集。Mayanne邀來林盛斌（Bob）、朱咪咪、吳若希及袁偉豪（Ben）擔任嘉賓，大談「襟撈」定義兼八卦地狂數三名「襟撈」型男，分別是郭富城、碧咸及陳豪！事緣阿Bob談到「願意合照」是藝人襟撈其中一個準則時，Mayanne興奮地大談與碧咸的一次同台經歷：「當時我做MC，安排緊啲客同碧咸影相，佢就擰轉頭同我講『Would you like a photo as well？』」隨即引發全場尖叫，城城則獲阿Bob點名讚「合照來者不拒」。阿Bob又謂「願意合照」其實是藝人絕佳公關：「嗰個人搵你影相，係因為佢鍾意你，佢咁同你影第一佢好開心，第二可能放社交平台讚吓你。」阿Bob續指農夫亦相當識做：「有時面對一啲新人或業餘主持人，佢哋上台前會問製作單位位主持叫咩名，上到台就會叫嗰個人個名，個主持人就覺得受尊重。」即場被票選為「襟撈」代表的阿Bob及咪咪姐，更大方分享演藝界「襟撈」金科玉律，密切留意。
最後一集嘉賓有吳若希、袁偉豪
朱咪咪同林盛斌
Mayanne講番當年碧咸主動問佢使唔使合照時，吳若希瘋狂尖叫。
袁偉豪成功過渡看淡負評：最好唔好講嘢
至於被即場票選為「唔襟撈」代表的吳若希，及舉手自認唔襟撈的阿Ben，亦先後獲機會「自辯」。其中自與太太張寶兒結婚後飽受不少負評的阿Ben，直認當初確實介意，但現在已看化：「我覺得你可以有自己睇法，但最好唔好講嘢，唔好喺網上表達自己意見，就算好簡單講句『我唔鍾意』，每個人接收你嗰句唔鍾意都有唔同睇法。」、「其實普遍大部分觀眾都唔認識我，同時仲會對我多咗個睇法，自己喺工作上努力咗咁多年會覺得唔抵；為頭家點點點，到頭來都有網民對你有另外睇法。當然嗰個係一個階段，呢刻你問番我，人生其實幾咁美好，生咗小朋友又可以同小朋友玩，亦冇咁在乎得失同人哋評價，咁其實就冇嘢。」阿Ben說畢，Mayanne及現場嘉賓即爭相指他放鬆了不少，對此阿Ben搞笑謂：「如果咁都唔鬆，真係唔使再撈喇！」
對於網民嘅聲音，袁偉豪明顯睇淡咗好多。
吳若希親解頒獎禮Over舉動背後真相
四位嘉賓還大派花生，Mayanne重提吳若希當年在《勁歌金曲》頒獎禮中，當宣布菊梓喬獲得女歌手獎時，如何overreact令全場爆尷的往事：「我喺個台度心諗：『吳若希你收斂少少好冇呀？你興奮過得獎嗰個，唔該你坐番低啦！」』吳若希即解畫謂：「因為我好緊張，當刻我心諗我未夠班，千祈唔好頒畀我呀，我攞咗又要畀人鬧喇。」Mayanne續指當時大會司儀都在台上盤數如何為吳若希打圓場，咪咪姐聞言即搞笑搭嗲：「點兜啫，做到咁出面！」Mayanne繼續「針對」若希謂：「我成日懷疑點解佢仲喺呢行，佢成日辣著網民，我同佢影合照放社交平台，啲人會喺我度留言問我點解仲同呢個人做朋友。」並指若希出事原因是經常「公審」老公，咪咪姐聞言勁驚訝：「呢啲私隱做乜擺上網？」到底自封「小辣椒」的吳若希會點樣回應？
對於吳若希喺網絡「公審」老公，咪咪姐大表費解。
咁到底吳若希會點回應？
Mayanne重演番吳若希當年喺頒獎禮失態一幕。
吳若希就解釋番當時嘅心情。
至於阿Bob的大型花生，就是當Mayanne問他接Job有沒有底線時，他揞名爆曾推掉一部三級片，隨即惹起哄動，阿Bob更會娓娓道來當時推卻邀約的真相！之後若希追問：「如果搵你好似黎諾懿要露半個pat pat呢？」阿Bob竟爽快以五個字答案回應，到底又是甚麼？另阿Bob還親述曾親自回應網民負評的往事，最終成功將嬲到爆粗留言的網民最後變成留言為阿Bob打氣，打底阿Bob如何以奇招化解戾氣？密切留意今晚最後一集《Mayanne小喇叭》。
阿Bob一講話曾經有人搵佢拍三級片，震撼到Mayanne即刻企起身。
吳若希追問林盛斌裸露底線，阿Bob個答案當然絕啜核啦。
吳若希追問林盛斌裸露底線，阿Bob個答案當然絕啜核啦。
阿Bob講番當年同細細粒嘅激烈親熱戲時，一度嚇親咪咪姐。
對付負評，阿Bob有自己一套嘅應對方法。
呢一集曾展望會為自己一件好唔識撈嘅往事公開道歉，到底咩事咁大件事？
