*

upload_article_image

首駕駛電單車拍劇 張振朗載張曦雯衝入人群好招積

張振朗笑言終於成就解鎖。

TVB新劇《踩過界II》今日(31日)到上水河上鄉拍攝外景,劇情講述「盲俠」王浩信身陷險境,張振朗駕著電單車載住張曦雯衝入人群拯救。張振朗透露考電單車牌成功後首次拍劇時親身上陣,笑言終於成就解鎖。

《踩過界II》眾演員到上水河上鄉拍攝外景。

蔡思貝帶住朱智賢入鄉公所避險,留下「盲俠」王浩信面對大批起哄鄉民。緊急關頭時,幸得張振朗駕電單車載住張曦雯衝入人群拯救。張振朗揸住電單車表現得揮灑自如,更載張曦雯到公共洗手間,表現相當招積。

張振朗同王浩信合作愉快,表示去邊度拍都無問題。

張振朗笑說:「難度一次比一次高,由拍第一集載住王浩信係用車架拍,之後拍幾套劇都仲係用替身,到今日終於都成就解鎖。」問到王浩信可有信心坐電單車尾?他笑說:「都有信心嘅,頭先見佢都有板有眼,振朗做嘢好穩陣。」

考獲電單車牌的張振朗親身上陣,仲招積地載住張曦雯去廁所。

王浩信對坐張振朗電單車尾有信心。

此外,提到《踩II》原訂到緬甸拍攝外景,但因疫情關係已取消,談到是否因此延長了拍攝時間到5月。王浩信說:「原定都係拍攝到4月,而家都係延長咗少少。(緬甸戲份點安排?)劇情去大澳都適合,拍出嚟嘅效果應該唔會影響可觀性。」

去唔到緬甸拍外景,王浩信覺得更好,唔使回港後花時間隔離。

談到未能出發到緬甸可有感可惜,王浩信說:「其實對演員嚟講去邊度拍都一樣,都係做返自己角色。公司都係保障大家安全,怕去到或者返嚟要隔離,變相嘥咗時間,」張振朗笑說:「我哋一齊拍嘢好開心,去邊都好,最緊要啲人腳靚。」