臨放工收到Peter電話，問我得唔得閒，話有班靚仔想請我食飯。原本想放工返屋企做facial，但聽到有靚仔，ok，一於奉陪！
去到蘭桂坊，果然成檯都係靚仔，除咗做律師的Peter，仲有會計師Andrew、藥劑師Raymond同埋第一次見面的生意人Horace。
點完菜，我問佢哋點解想請我食飯？Andrew就話留意到我早幾日我喺度寫的文章，話對佢哋好唔公平，想今晚嚟個太平反咁話！佢話唔係個個男人想出軌，仲話有啲姊妹查實好乞佢咃啲巴打討厭喎。好，一於洗耳恭聽！
No.1 食唔停，無形象
Horace話最怕嗰啲成日食唔停的女仔，雖然好多女生食極唔肥，但就算氣質幾好的美女，只要嘴巴不停動，就乜嘢形象都幻滅囉！
No.2 小氣，嘮嘮叨叨
Peter接力話最怕女仔「吟吟噚噚」，好似想用口水淹死男友咁。佢試過有個ex，只要捉到Peter做錯少少就講，仲要係講到沒完沒了。Peter平時喺法庭上能言善辯，當然忍唔住反駁，結果就成日鬧交，拍拖無耐就分手！
幾個男人點晒頭，話女仔做錯就死不認賬。喂！呢個係我哋姊妹的特權喔！
No.3 逼男友坦白過去
Andrew就話最怕女友逼佢坦白交代過去歷任女朋友，唔講唔高興，講咗就更加唔高興，無解！
No.4 狂發短信
Raymond話最怕女仔有事無事都whatsapp佢！一瞓醒就收到，即使啱啱食完飯送完佢返屋企唔夠幾分鐘又收到。佢話有啲女仔whatsapp訊息得一個，但又時有連發幾百字，但好多時都唔知佢想講咩。
No.5 頻繁洗澡
我一聽到就話愛美是女仔天性呀！抗議、抗議……
不過Raymond話沖涼是保持個人衛生，但唔明點解有些女人一天沖幾次囉？佢話有個ex每天至少沖三次，令佢難以理解。
No.6 照鏡子
整理儀容好啱，但Peter話凡事有限度，有些女人照鏡照唔完，仲要扮萌樣俾自己睇，就認真頂唔住！幾個靚仔話，吸引女人視線最好都係擺塊鏡喺自己身上囉！
No.7 嗲男友
嗲男友是女人專利：顯得更可愛，但Horace話不分場合嗲男友，只會讓人無可奈何。
No.8 煲電話粥
Horace話明明當面兩句能講完的事，一到電話就唔知點解，講成個鐘頭都收唔到線。
No.9 逛街購物狂
我認，女人最愛行街買嘢，Peter就窒我話讀書年代，女仔最怕體育堂，跑兩個圈就個個虛弱得好似《紅樓夢》的林妹妹。但去商場睇吓，就發現女人體力未必差得過男人。
No.10 人比人、比死人
Andrew 話拍拖的女人最鐘意鬥男朋友商個靚仔、有錢、浪漫。到結了婚，就要比老公事業、身家，還要比孩子。真係比足一世都唔夠。
男女拍拖是門大學問，即使我縱橫情場多年都仲係學緊！各位絲打巴打要努力呀！
芝芝‧知性
** 博客文章文責自負,不代表本公司立場 **