*

譚玉瑛最愛與靚仔合作 大讚小鮮肉黃庭鋒

「去到邊度拍嘢,人哋未知佢乜名,都只係話:『乜你咁靚仔嘅?』」

TVB飲食節目《香港原味道》播到第四輯,今輯由譚玉瑛夥拍「小鮮肉」黃庭鋒、孔德賢及林正峰做主持。其中黃庭鋒跟足阿譚兩年,做足四輯成為「鐵腳」,點解有得留低呢?譚玉瑛即說:「因為佢靚仔囉,去到邊度拍嘢,人哋未知佢乜名,都只係話:『乜你咁靚仔嘅?』」搞到在旁嘅庭鋒面都紅埋。

庭鋒被安排落田耕種體驗農夫生活。

阿譚最鍾意同靚仔合作,所以繞住黃庭鋒手臂唔放。兩人邊做節目邊食好嘢。

31歲嘅黃庭鋒(Telford)入行前曾經喺國際學校教體育,就算做咗藝人都繼續修讀中文大學嘅體育文學碩士課程。譚玉瑛對黃庭鋒讚不絕口:「佢除咗好靚仔,仲好親切,有晒《香港原味道》需要嘅嘢。我最鍾意同靚人合作,咁會開心啲,加上佢又做到嘢。」黃庭鋒就賣口乖:「重點係我由第一輯開始跟邊個學嘢呀?咪係由細睇到大嘅譚玉瑛姐姐囉。」問到黃庭鋒跟李家鼎,阿譚最Like邊個?她笑說:「同鼎爺合作好唔同,佢要show quali,我就好似學生咁不斷學嘢,學到嘅嘢可以放喺《香港原味道》施展吓。」

林正鋒、譚玉瑛、黃庭鋒、孔德賢是第四輯節目主持。

黃庭鋒同何廣沛及李佳芯合作拍過電視劇《愛美麗狂想曲》。

第一次耕種

黃庭鋒就指譚玉瑛姐姐對食嘢好有熱情:「每次拍嘢佢會入去廚房睇晒所有嘢,每樣嘢都想參與,雖然佢喺呢行咁耐,但熱誠冇減退。」阿譚反問:「唔係話我為食呀?」《香港原味道》不停添食到第四輯,阿譚表示因為好多上咗年紀嘅觀眾想搵返回憶及味道,而今輯最大變化係加入後生仔研發嘅本地食物。庭鋒仲畀導演安排去耕種兩畝田,一手一腳翻土、疏苗、搭棚、播種等,他形容攰到不得了,但係一個新體會。

兩年前拍第一輯,黃庭鋒跟譚玉瑛及吳幸美學嘢。

黃庭鋒曾經喺台慶頒獎禮中提名角逐「男配」及「飛躍」獎。