*

麥包自爆入行多年被辱罵辛酸史 寫劇本捧自己做男一

加油啊!

大丈夫能屈能伸,入行33年的麥長青(麥包)參演過無數劇集,90年代終由跑龍套努力爬上二、三線,尤以《西遊記》、《茶是故鄉濃》最為人深刻,惜後來未獲公司善用,再次淪為二打六並遭幕後白眼、出言辱罵,「每個男士都想將最好畀屋企,有時做嘢,為生存,人哋嘅無理取鬧都要承受。」一直視演員為終身職業的他曾心死想轉行,後來於2010年奪男配角獎而留低,未料數年前發生iPhone炒賣騙案事件再遭投閒置散,不過52歲的麥包沒有放棄男主角夢,離巢後跟ViuTV合作無間的他已積極寫劇本,盼自己捧自己!

麥包於ViuTV新節目《中佬唔易做》體驗做GOGOVAN司機。

離巢後,跟ViuTV合作無間的麥長青積極寫劇本,盼自己捧自己!

效力無綫33年的麥長青去年4月正式約滿離巢,其後過檔ViuTV拍電視劇《娛樂風雲》、夥拍金剛主持節目《C9 旅行團》,近日又為新節目《中佬唔易做》任嘉賓,機會不斷。本周四(4日)啟播的《中》,他將體驗「轉行」做GOGOVAN司機,並大談娛樂圈辛酸史。

仍憧憬做男一的麥包認為有機會點解唔試?就算試完跌番落嚟都冇所謂。

當年主持兒童節目時,僅得3、4千薪金的麥包靠送貨、砌傢俬賺外快。

為了養活家人,作為一家之主的麥包即使尊嚴被踐踏仍咬緊牙關捱落去。

遭導演喝斥

做男人為生活可以忍,麥包憶述早年於舊東家遭投閒置散的一段日子,「喺攞獎前,雖然有劇開,但由二、三線突然變番做閒角。人好現實,有啲導演會覺得你而家唔受公司重用,直頭當你冇存在價值,試過睇完劇本,覺得有啲嘢可以發揮,我就照做劇本嘅嘢、做哂反應,但導演大聲喝斥『喂!搞咩呀?做咩戲呀?!唔使喇!唔要呀!行入嚟得㗎喇!個位唔喺你度呀!』」麥包覺得令佢好無癮,又認為呢行嘅人鍾意踐踏你自尊,覺得咁樣先有存在價值,但好彩幕後人好有愛,「當時啲Crew都知道咩事,所以最窩心係啲同事拍拍我膊頭、揼揼心口。有人話我EQ高,我可以點啫?不嬲訓練班教喺廠導演大哂,咁咪算囉,好多嘢他朝君體也相同,你會受番。」

成為商界女強人的陳妙瑛當年開出3倍以上人工,聘請欲轉行的麥包為她打理飲食生意。

2010年,憑《巾幗梟雄之義海豪情》終奪最佳男配角的麥包打消轉行念頭。

在無綫的最後3年,零劇拍的麥包主力跟滕麗名、江美儀主持《街市遊樂團》系列。

回復自由身的麥包頻頻與ViuTV合作,早前更與金剛一同主持《C9 旅行團》。

相隔27年,麥包早前跟朱茵於內地綜藝節目《熟悉的味道》再合作!

麥太6年前誤墮iPhone炒賣騙案,不但被騙逾400萬元,更累老公遭「大耳窿」到無綫追數,辛辛苦苦捱到男二的麥包因此被公司雪藏,他在庭上說:「未到高峰,就畀呢件事拉番落嚟,我由九線尾、十線頭,一步一步行到今日,人生有幾多個咁多年呢?」

離巢開心晒

當時,萌生去意的麥包致電好友陳妙瑛,對方即以3倍人工請他幫手打理飲食生意,最後憑《巾幗梟雄之義海豪情》終奪最佳男配角的他,因演戲獲得成功感而打消離巢念頭;直至太太林孜誤墮iPhone炒賣騙案一事,再次被丟入雪櫃的麥包在劇集方面零產量,只一味主持《街市遊樂團》系列,他嘆道:「作為演員冇劇拍仲有乜意思。(心灰意冷?)又唔係嘅,每間公司都有佢哋制度,冇劇拍咪離開囉。」跟中港不同平台合作過後,麥包坦承更開心、舒服,「因為獨立製作,大家會互相幫忙,團隊對演員都好尊重。如果一間公司養咗你,慢慢個架構就變咗職位高低,有人鍾意玩官威、權力遊戲嘅話咪擺款囉。」並謂現在仍憧憬做男一,目前正努力寫劇本,希望將來再跟ViuTV合作拍劇,實行自己捧自己!