新節目「轉行」揸的士又送外賣 43歲敖嘉年繼續發「演員夢」

敖嘉年原定4月在港演出舞台劇《周璇》，惟最終受疫情影響延期。

提到於社交網分享「揸的照」引起轉行誤會，嘉年即自爆有朋友主動提議為他牽線「接客」，令他大感詫異：「有個好耐冇見嘅朋友突然WhatsApp我，好含糊話『唔緊要㗎，好多嘢都面對到嘅，我得閒就介紹啲客畀你』，我諗咗陣，我做演員，介紹啲咩客畀我呢？咁我就好奇怪嘞，佢先話『我淨係會同佢哋講有架車可以接人，唔開你名，你唔需要尷尬』。（以為係飯局？）係啦，但件事好好笑又幾窩心！」獲不少好友和網民鼓勵的他又謂暫時不會轉行，皆因：「我仲未發完呢個夢！」

敖嘉年剛入行時遭前輩寸樣衰，仲勸他退出幕前。

回想初入行被前輩寸樣衰，又被路人直呼茄哩啡，當時嘉年都諗過約滿便離巢，幸後來獲高層曾勵珍賞識，轉型拍劇；歷盡冷言冷語後，他亦決心以身作則善待後輩，「見到後輩唔開心我都會畀信心佢哋，其實好慘，人家雄心壯志做嗰樣嘢，你咁樣玩佢，令人個心鬱住，你應該令佢做得更好、更落力，而唔係鬧鬧鬧！」

《伙記辦大事》是敖嘉年離巢前拍的最後一套無綫劇。

敖嘉年年初宣佈約滿離開無綫，並謂過去有苦有樂。

對於遲遲未能攀上男一，雖然嘉年坦言恨做男主角，但演員受許多因素影響，故會抱住隨遇而安的心態，目前也一直搞緊自家製作。