*

無關心前夫與姚子羚 蔡宛珊拒參加富二代船P

Sarika強調出海純粹做運動,而非釣金龜!

前夫Raymond曾經同姚子羚拍拖惹來後者食人夫疑雲、擁32D、24、34火辣身材的蔡宛珊(Sarika)不時出海,更在社交網站大晒三點式泳衣照,網民當然讚Good。雖然同Raymond正在分居,但Sarika不愁無市場,她更自爆有好多人邀她去船P,但她一概Say No:「我純粹出海做運動,唔係釣金龜!」

蔡宛珊有32D、24、34火辣身材,所以唔怕Show出嚟。

蔡宛珊

Sarika每周勤做四次運動,亦會留意飲食:「為咗夏天要出海騷吓啲泳衣,我斷食16小時嚟Keep Fit,每晚八點收工後先開始食嘢,主持ViuTV飲食節目《今晚趁熱食》時,同事話我升咗仙咁,冇計啦,要有取捨,其實我好為食,每周會打兩次邊爐,嚟緊好多生日飯,留返限額食鍾意嘅嘢,唯有平日乖啲忍吓口。」

蔡宛珊好鍾意去健身室做運動,每周至少去4次。

跟女神陳嘉倩合作主持ViuTV飲食節目《今晚趁熱食》,日日開廠好忙。

Sarika好鍾意出海,曾瘋狂地每周出海兩次:「曬到一身健康膚色,個個以為我係游泳健將,其實我唔識游水,只係唔驚死,就算攬住條浮條都敢跳落海,着住救生衣就玩滑水。」

最近蔡宛珊愛上滑水,經常約朋友出海。

提到馮盈盈參加船P被指釣金龜,而船P亦被標籤為結識公子哥兒的踏板, Sarika即Say No:「我只會參加合家歡嘅船P,來來去去都係同有家室嘅契哥及相熟朋友出海,全部都一家大細出發。」Sarika強調唔會上唔識嘅人嘅遊艇,「我知有啲人好鍾意個個都叫吓,叫到一大班人一齊玩,我就好避忌呢啲,始終唔知咩人,又唔知點玩,有好多時叫你飲酒。」

蔡宛珊強調出海唔係為咗釣金龜,搵男友唔使要有錢,最緊要價值觀相近。

Sarika更重申鍾意出海係是因為想去游水、滑水及曬太陽,「家我只會約埋三五知己,直接喺深灣碼頭上滑水船去海中心輪流滑水,滑完就走,連遊艇都唔使上。」

蔡宛珊為著泳裝好睇,堅持努力做運動。

着住泳衣嘅蔡宛珊冇避忌,晒身同狗狗玩。

問到拒絕參與識朋友活動會否失去好多黃金機會?Sarika說:「我冇咁嘅福份識到公子哥兒,家又唔係刻意唔拍拖,分居冇留低陰影,只係暫時未遇到啱,我永遠都相信愛情,亦好清楚自己想要啲乜,唔會亂咁試,擇偶條件係要孝順父母,專一同錫我,最緊要係鍾意做運動。」

Sarika經常跟老闆林盛斌一齊做活動司儀,兩人仲會合唱娛賓。

Sarika坦言同前夫Raymond好少聯絡,但大時大節都會互相問候,但無關心他有否與姚子羚復合:「最重要係佢開心同健康,私人嘢留返空間畀佢。事件過後我都冇同姚子羚聯絡,我好忙,好少睇電視,冇睇過佢啲戲,有時間都睇返係自己個台嘅戲啦!」

跟Raymond仲有兩年先完成分居期,但兩人大時大節都會互相問好。

蔡宛珊冇過問前夫感情生活,包括是否同姚子羚復合。

姚子羚偏瘦,蔡宛珊建議她改善飲食習慣。

此外,考獲健身牌的Sarika還會每周教朋友做街頭健身,有指「情敵」姚子羚過瘦,問她會否幫子羚增肥?她即婉拒:「我知佢食素,可能佢喺飲食方面要改善,OK㗎啦!佢都keep得好好,唔使我教佢啦!」