雖然已經睇化哂,但Khloe唯獨對音樂熱誠不變。
相隔4年,朱紫嬈(Khloe)自資推出新歌《花.醉》作為入行10周年禮物。日前下午朱紫嬈還為「頭條娛樂FB專頁」開Live現場演繹,靚聲令網民激讚,連Kellyjackie都入嚟做埋聽眾,還承諾會接力做直播,唱靚歌給讀者聽。對於轉眼對於轉眼入行10周年,Khloe形容歲月催人老,現在在生活同工作上都「睇化晒」,唯獨對音樂熱誠不變。
雖然疫情下少了收入,但Khloe依然揼本落去做新歌,而《花.醉》係唱出入行10年嘅心聲:「10年時間真係唔短,當日好多親密戰友都各散東西,好似鄧芷茵、吳彤、韋雄、鄭家維咁,唔係移民就成家立室離開咗歌壇,如果唔係鍾意音樂嘅心永遠喺度,真係好難捱到今時今日。」
Khloe自爆長期失眠,至今狀況未有改善,只係比以前冇咁緊張:「初入行時負能量好重,工作同感情方面好易令自己唔開心,而且去到病態地步,試過要睇醫生,食藥嚟放鬆自己,好彩依家睇化咗,雖然仲有失眠,但都叫可以Keep到情緒,𠵱家咪做啲自己想做嘅嘢,鍾意做嘅嘢囉!好似呢首歌咁,我有出少少錢,多有多使,少有少使啫,咪揼吓朋友心口嚟減少成本囉!」
原本Khloe打算今年5月舉行十周年演唱會,不過受疫情影響,演出不斷押後,可能要延至明年舉行。她坦言為了生活,年前開始同朋友合資搞泰國地產生意,她邊學邊做,又拍劇,謀求更多出路。