MIRROR成員首度個人身份競逐 AK、阿Jer望拖埋前隊友阿Lo衝線

二人互笠高帽直言較睇好對方奪獎。

MIRROR成員AK（江𤒹生）和阿Jer（柳應廷）早前各自推出第3首單曲《金星女孩》及《風靈物語》，兩人都認為今年能夠在疫巿下推出到3首單曲實在不容易，亦都好感恩。

對於今年首度以個人身份競逐年尾頒獎禮，他們笑言最想跟同樣今年單飛的隊友Anson Lo（盧瀚霆）齊齊拖住手衝線，邊個得獎都一樣咁開心，不過他們又互笠高帽直言較睇好對方奪獎。

阿Jer和AK雖然今年齊齊爭新人奬，但兩人認為是良性競爭，完全冇火藥味。

阿Jer話新一年想唱歌技巧有進步，即令自認唱歌未夠好的AK不滿。

AK謂《金星女孩》講每個人心目中都有個女神或者男神，他更隨即向心目中女神、韓國女團SISTAR的寶拉示愛，「我覺得佢好靚，佢又好運動型，但係個樣睇落好sweet好靚好可愛，我鍾意啲可愛型嘅女仔。」至於阿Jer就指《風靈物語》跟另外兩首物語系列歌曲一樣，有着相同的訊息，「想講黑暗之中要堅持，要撐過去放開釋懷，不過《風靈》就係帶大家去未接觸過嘅世界。」

2021年，AK想唱歌有進步外，仲想學多些音樂上知識。

阿Jer想2021年可以嘗試演唱更多不同曲風。

AK和阿Jer今年首度以個人身份競逐頒獎禮，他們最想拖埋阿Lo一齊衝線。

對於頒獎禮首度以個人身份參與，AK和阿Jer都覺得好興奮，又互笠高帽睇好對方奪獎，但夢想是跟Anson Lo㩦手得獎，「有機會真係想3個一齊，我哋幻想過最美好嘅畫面，我哋有3個金銀銅一齊拖住攞獎，一齊衝線，咩排位都冇所謂，同埋相信MIRROR其他兄弟都會back up住我哋，我哋攞獎其實都係代12個兄弟去攞，希望到時天公做美啦！」

AK的《金星女孩》講每個人心目中都有個女神或者男神。

阿Jer新歌《風靈物語》，跟另外兩首物語系列歌曲一樣，想講黑暗之中要堅持，撐過去放開釋懷。

阿Jer為令自己進步，每星期都開live唱歌。

踏入新一年，阿Jer和AK都各有願望，不過阿Jer一講即引起AK不滿，相當搞笑。阿Jer話：「有啲嘢覺得自己做得未夠好，唱歌技巧仲有好大進步空間。（AK：大佬呀！好明顯呢樣嘢係我講㗎啦！你一嘢搶咗去講，你講跳舞得唔得呀！？）哈哈！我只係覺得出道兩年，想再快啲進步，希望唱歌愈嚟愈穩定，可以唱到唔同嘅曲風。」AK除了唱歌技巧進步，2021年會繼續努力進修音樂知識，「我想去學多啲音樂上嘅知識，希望可以將來有機會參與到作曲或者音樂上嘅嘢，我唔想剩係齋唱，我想自己可以玩多啲唔同層面嘅音樂，所以嚟緊一年我會努力去學習。」

Jer柳應廷高唱我行我素走我路！

由推出第一首單曲《水刑物語》開始，柳應廷Jer就一直在創作與主流音樂作品迴異的歌曲，每一首歌曲為樂迷帶來驚喜的同時，有時亦會予人怪誕感覺。不過Jer卻覺得怪誕都有其獨特魅力，就好似他的偶像導演添布頓Tim Burton，受人愛戴追捧，而新歌《筆觸男孩憂鬱之死》，就是唱出Jer在音樂創作路上的心聲。

柳應廷（Jer） 以怪誕造型拍新歌《筆觸男孩憂鬱之死》MV。

Jer鍾情添布頓的作品，今次《筆觸男孩憂鬱之死》的創作靈感，也來自添布頓。Jer道：「我好喜歡添布頓創造嘅世界，不論畫作還是電影，荒誕得嚟又帶有獨特嘅魅力，《筆觸男孩憂鬱之死》就係由佢畫家同導演呢個角度去切入：無論你係乜嘢人，只要相信自己，堅持做自己覺得啱同開心嘅事，最終會建構到屬於自己嘅世界。」Jer深信，不論做任何作品，只要堅持自己，到後來回望，就會見到由自己一手打造，屬於自己的音樂路。

受導演添布頓影響。

堅持創作信念。

所以今次《筆觸男孩憂鬱之死》，Jer便找來全新班底合作，包括作曲的T-Ma及填詞的鍾說，來個新嘗試，Jer很喜歡這個組合，道：「 T-Ma好快就諗到好得意，市面上又唔多見嘅旋律，至於鍾說，我哋傾歌詞內容時，都不其然講起尊尼特普（Johnny Depp）同添布頓，於是我哋就諗到不如用畫家角度，唱出我嘅想法。」鍾說特別在歌詞中加入了一些添布頓電影的元素，大家聽歌時可以細心發掘一下。

新歌高唱我行我素走我路。

既然歌詞裡面出現了添布頓的元素，今次MV也就順利成章，讓Jer以怪誕造型演出，Jer介紹道：「我好鍾意電影《怪誕屍新娘》（Corpse Bride），所以MV其中一個黑白間西裝造型，靈感就係來自電影裡面嘅主角Jack，而我身上嘅玩具：恐龍、權仗、車、玩具珠寶等等，其實代表每個人內心嘅慾望。除此之外，我個妝就好似一個畫家喺我塊臉上面繪畫，畫咗唔同嘅彩繪。」而Jer飾演的瘋狂角色，就是一位創造家，在甦醒帶大家參觀他所創造的地下收藏室。Jer繼續介紹MV道：「其他角色嘅眼耳口鼻都畫喺唔同地方，呢啲都係我所創造嘅人物。喺收藏室裡面，每通過一度門，就好似帶聽眾逐步深入我嘅收藏世界。」

Jer帶大家走入怪異世界。

添布頓被形容為怪誕導演，那麼Jer也是一個怪誕的人嗎？他親自解構道：「我都係一個怪怪地嘅人，因為我鍾意玩，行為有時都有啲怪異，例如成日大叫、暴走，打牌自摸都會咁，我有時都控制唔到，玩起上嚟就會好癲，所以我唔驚『怪誕』呢個形容詞，亦唔覺得陌生，只要自己開心Enjoy就得，實行用自己魅力感染人哋。」

Jer以怪誕造型演出。