為《造星III》停Job半年兼向公司借錢 陳葦璇公開搲撈還債

葦璇希望一個月還得晒啦！

熱爆的《全民造星III》上周六總決賽順利結束，一直被睇高一線、冠軍在望的陳葦璇，最終只得亞軍，不過自言不算有觀眾緣的她，覺得觀眾票選排行第三名，已經好滿意成績。其實葦璇15年參加選拔賽加入女團As One出道，到17年單飛，人氣遠遠不夠參加《造星III》，Instagram（IG）的follower暴升。雖然賺到人氣，但荷包反而乾塘，節目無演出費外，她自爆忙比賽半年搞到零收入，仲要自資請dancer、訂造服裝同搵造型師等等，瓣瓣都係錢，好彩經理人公司墊支6位數，攞完奬仍要還負債的葦璇，唯有公開搲撈，已有幾個工作接洽中的她，更定下目標，「希望一個月還得晒啦！」

葦璇直言細個會為千五蚊參加歌唱比賽，可以買個名牌書包，但現在參加《造星III》表面上蝕住做，但覺得好值得。

比賽前，葦璇原來已錄好新歌，她預告想搵《造星III》參賽者演出MV。

對於今次賽果，葦璇相當滿意，因自評觀眾緣不及其他參賽者，「今次因為有民選，民選我係第3嘛！我已經好滿意。我係冇信心（民選），因為我見Cloud（雲浩影）、Ben（趙祥誠）、ANSONBEAN（陳毅燊）佢哋全部都係大家好喜愛嘅性格，都係比較親和力，可能我一向形象比較cool。」

大熱的葦璇認為賽果合理，敗給冠軍Ben完全冇失望。

其實葦璇的觀眾緣，靠《造星III》入屋程度已幫她儲埋唔少，IG的follower暴升3萬5千個，6萬4千激增至近10萬，仲收到不少人DM她讚她唱跳好睇，當然最直接是畀fans認得，「好surprise，啱啱同經理人食飯，餐廳有個媽媽級嘅食客叫我『葦璇』，真係好幸福，原來𠵱家電視仲有咁多人鍾意睇！」

葦璇認為比賽中，《給十年後的我》是她的轉捩點，令她放低扮堅強的軀殼。

葦璇比賽期間一直表演出色，但亦有部份負評出現，首先網友認為25歲的她表現老積，特別在總決賽演唱林憶蓮的《願》，更慘評似演出《流行經典50年》，身經百戰的她卻答得輕鬆，「我個樣係生成咁嘛！其實我細細個已經係咁嘅樣啦！哈哈！18歲已經畀人話似25歲。而我覺得好有幸唱到《願》咁經典嘅歌，同埋係搵咗Travis（參賽者）重新編曲。點解要揀首咁難嘅歌嚟唱，田為首歌意義等同於《全民造星III》『最尾一幕，還未閉幕，最濶的路在塵世遠方』就算呢個節目完咗，我哋仲有好遠嘅路要行。」不過她笑言有在打扮上下功夫減齡，譬如這天專登留了額前的蔭。

選唱《願》被狠批老餅，葦璇解釋歌曲經典兼內容好切合比賽。

至於葦璇因經常穿bodysuit表演而被網友狠批長期冇褲著，亦被指雙腳線條未夠吸引，她亦完全不介意，「我自己好鍾意歐美裝，好期待可以有一日可以有個紅館咁大嘅舞台可以承托到咁爆嘅裝，睇外國嘅歌手Lady　Gaga、Beyoncé、Jennifer Lopez，甚至係蔡依林同（容）祖兒喺演唱會，10套有5套都係呢啲cut，我自己想試囉！今次有咁大嘅舞台，就做自己最鍾意做嘅嘢，依家唔試唔知幾時可以做呢樣嘢！至於我條腿不嬲都係運動員腿嚟，如果大家有睇我以前啲片條腿仲粗，我對依家條腿都幾滿意。我唔強求觀眾全部外形都鍾意，但係我覺得嗰套衫係好靚嘅。」

葦璇總決賽這身造型，網民唔多buy，除了覺得「成日唔着褲」，仲嫌她腿粗。

葦璇這件度身訂造戰衣其實真係好靚，咁貴只因要人手縫上珍珠同閃石。

葦璇在20強演出《Born This Way》以及30強以女團唱《Hey Sistas》時，已穿bodysuit。

不過，原來這些演唱會級表演效果，比賽期間零收入的葦璇，自爆要向公司借錢6位數才能完成夢想，「盡量慳啲使囉！你睇吓我都自己煮嘢食，呢個比賽開頭唔係用好多（錢），係20強唱《Born This Way 》同埋決賽嗰晚《Get Right》要請Dancer，主要都係人手上，styling都有用咗啲錢，戰衣都要幾千蚊！Alina（李靜蓮）話嗰件都要幾千（差不多一萬）嘩！佢真係有錢！（佢話用晒身家）問Stanley攞，哈哈！」

葦璇要狂接job還債給公司，剛剛已有個網上廣告出街。

參賽無數的葦璇，認為今次賺得最多是友誼。

其實葦璇已非首次跟Cloud比賽，早在13年「全港中學校際歌唱大賽」時，當年賽果似今日翻版。

葦璇小時候是田徑運動員，曾代表體藝中學參賽奪獎。

由於靠公司墊支，葦璇坦承要努力接工作，「我嘅心願，終有一日會如願，就係搵多啲job。已經有幾個報緊價，廣告之類，大家可以再幫多啲，真係要靠你哋，我搞唔掂呀！我希望一個月還得晒！」不過問到如果這10多萬，當交學費又抵唔抵呢？葦璇好肯定話：「抵！同埋緣份呢樣嘢，係用錢買唔到！」

入圍10組（見附表）同時獲發10萬Coins，結局是Coins增加還是減少，就要看以後遊戲表現，金 素人藝人互鬥白熱化！

J2逢周一至周五晚10點半，推出15集自家製旗艦綜藝節目《海馬牌床褥特約︰我要瞓鬥》，由陸浩明（6號）、曾比特、陳葦璇及黃山怡 (糖妹)擔任主持、鄭子誠聲音旁述。J2（82台）王牌節目《海馬牌床褥特約︰我要瞓鬥》，是《恐懼鬥室》式求生真人騷，14組「瞓鬥師」要留在錄影廠內60小時馬拉松式玩遊戲，為10萬元獎金獎品作困獸鬥。首集節目已經毫無冷場，自第一項遊戲砌puzzle開始，陸續考驗各人眼力、耐力及聽力。到27日剩餘10張床位已「名花有主」。入圍10組同獲時發10萬Coins，結局是Coins增加還是減少，就要看以後遊戲表現。

10組「瞓鬥師」成功霸佔床位入圍，藝人跟素人各佔5隊

28日比賽，為人性間的勾鬥及猜疑揭開序幕。簡單如大會派發由星級名廚Gabriel 製作的兩款早餐︰火雞卷配南瓜意大利飯、煙三文魚藜麥配櫻桃汁沙律時，雖然美食當前，但各人仍然疑心生暗鬼，面上佈滿猜疑同不安。瀅仴還叮囑拍檔Samlau「食嗰陣要望真啲」，連攞第幾碟都要計算。Amber更問主持「可唔可以唔揀呀，係咪一定要食呀？」認定背後一定有陰謀。就連一班素人都唸唸有詞「就咁食，有無咁簡單呀」，猜忌已在「瞓鬥師」間散佈。

早餐由星級名廚Gabriel炮製。

瀅仴同拍檔Samlau揀完早餐，遲遲不敢開餐。

Amber同Nicole疑心到想放棄食早餐。

食飽之後有一小時休息，有人吹水、有人自娛。但有兩組藝人趁機運用戰術以增加勝算，先有胡美貽（Nicole）、陳若思（Amber）實行擾敵政策，Amber負責大嗌擾人休息，另一邊Nicole每見人想閉目養神，就在床邊猛䟴，破壞對手休息時間。加上稍後二人在「突擊測驗」環節中取得高分，很快便成為眾矢之的。另一邊，奶仔攻心計開始拉幫結黨搞聯盟，最先拉攏是同屬藝人組的「帽子男孩」。奶仔先開出條件誘之以利︰「或者我哋結盟，任何一隊贏每人分兩萬五。」接住施展「威嚇」手段，叮囑對手有被孤立的可能，玩出真人騷精髓。

休息時間Amber同Nicole行過路過，不忘打搞閉目養神的「瞓鬥師」。

奶仔利誘、威嚇兼備拉幫結派

另一方面，藝人組同素人組目前各佔5隊，之間的鬥爭亦趨白熱化，特別是玩「暗題」遊戲時更加明顯。大會安排「瞓鬥師」上堂，同時各人獲發一句「暗題」，只要在課堂成功講出而不被發現，就可以加Coins，相反就會被倒扣。素人組在此環節，成為藝人組「追殺」對象，接連被舉報，想知道他們如何互相「篤灰」爾虞我詐，就要留意今晚節目播出。

「暗題」環節藝人同素人各出奇謀爭獎金。

藝人同素人互篤務求令對方扣錢，兩組人鬥爭趨白熱化。

奶仔舉報令多組「瞓鬥師」被罰錢，非常惹火。

29日負責早更的糖妹同陳葦璇登場，更請到6號連踩兩更協力。第一個集體任務，就是要在限時一個鐘內，在錄影廠內找出100個正在響鬧的鬧鐘。在電視城錄影廠同時出現100個鬧鐘，場面何其壯觀，確實是項創舉。今趟為團隊戰，一個鬧鐘都不能少。為免被扣Coins，藝人隊同素人隊放下暗鬥，齊心協力。在尋找的過程才知道，原來並不是「搵鐘」那麼簡單，當中有10個鬧鐘需要解謎，考耳力同時又考解謎及推理能力。明晚點止「搵鐘」咁簡單。

節目已進行了12小時。

早更主持糖妹、陳葦璇登場，6號臨時加班撐場。

100個鬧鐘一齊在電視城錄影廠響鬧，應該是項創舉。

各「瞓鬥師」要在偌大的錄影廠找出鬧鐘。

不只「搵鐘」那麼簡單，當中有10個鬧鐘需要解謎。