為女唔揸辣跑又戒食火鍋 郭富城一拖五速食薯條

榮升兩女之父後，城城甚少出席社交場合，逢生日或過節必定陪家中3個情人度過。

城城中秋時，跟妻女去行公園兼賞月。

城城上月在內地趕拍新片《我的爸爸不一樣》時被粉絲「野生捕獲」。

雖然貴為天王，但他都非常Down to earth，當日約傍晚5點，城城一家在商場Shopping完後，步行到底層覓食，城城先在Coffee Shop買了杯熱啡，隨即在大街上除罩邊行邊歎，行到附近一間西餐廳時，「城嫂」先去攞位，城城就去陪坐在旁邊長椅的囡囡和外母。

城城在Coffee Shop買完杯熱啡，即在大街上除口罩邊行邊歎。

城嫂去攞位，城城就陪囡囡和外母在餐廳外玩住等。

出名是「火鍋控」的城城為遷就囡囡口味，陪大家去食西餐。

其間街上人來人往，城城都未有介意途人目光，全程站著低頭同大寶傾偈，𠱁囡囡開心。一見有位，眾人即移師店內坐低點餐，由於現時本港正實施傍晚6點後禁晚市堂食，他們只好兩個兩個隔住塊膠板坐，兼6個人點兩份大薯條，3歲大寶好叻豬識得自己拎薯條食，但1歲多的妹妹就要婆婆抱住餵食，但咬了一口，二寶就皺晒眉頭擰晒頭，家傭姐姐即拎出豬仔水壺，服侍小公主；至於「城嫂」則不時四圍望，高度戒備，而城城掛住用叉拮薯條慢慢嗒，相當悠閒。

1歲多的二寶要婆婆抱住餵食薯條，好得意。

因為傍晚6點後禁堂食，所以城城一家都好聽話即刻埋單返屋企。

極速於20分鐘內食晒啲薯條，搭正6點大家便起身走人，一步出馬路見到記者，兩公婆即禮貌向鏡頭Say Hi，其後城城獨自去取車，一班女人仔就在停車場等坐駕駛至便上車返屋企。

城城和方媛翹住手快步去停車場取車，兩個囡囡則由外母和家傭姐姐湊住。

方媛拖住囡囡站在路旁等老公駛架車過來，紮住個「春麗」頭、仲褸仔跌晒膊的大寶Cute到爆。

為了載妻女和外母，城城改揸白色保時捷家庭車。