【新股速遞】諾輝健康於內地經營癌症篩查檢測業務

在2015年成立的諾輝健康(06606)主要於內地經營癌症早篩檢測業務，現時專注設計、開發癌症篩查測試及推出商業化產品，旗下王牌產品為兩大用戶家居結直腸癌篩查測試產品，包括常衛清及噗噗管已獲國家藥監局批准。
集團現時未有盈利，截至2020年上半年，虧損5.5億元(人民幣，下同)，2019年同期淨虧損為1488萬元；2018年及2019年全年虧損分別為2.25億元及1.06億元。至於營業收入方面，2020年上半年1052萬元，低於2019年同期的1317萬元；2018年及2019年全年營業收入分別為1881萬元及5827萬元。
諾輝健康有兩款胃癌及宮頸癌的癌症篩查後期候選產品，利用糞便的自檢胃癌篩查測試的幽幽管已完成註冊試驗，並將在今年底向國家藥監局提交註冊申請。
管理層指出現時內地篩查普及率未及西方，加上所屬行業的技術門檻高，特別相信區內在腸癌症早期篩查於未來5年也難見有競爭對手出現，相信集團具有領先發展優勢，市佔率能達至100%，期望在2030年產品市場滲透率可達到20%至30%。有市場人士認為，隨著踏入農曆新年長假期港股有機會趨向淡靜，加上快手(01024)上市後令大量資金「解凍」，看好諾輝健康的認購反應會偏向熾熱。

6月20日，天氣炎熱，部份時間有陽光，間中有幾陣驟雨。隔晚美股休市，歐洲股市見回吐，但跌幅唔算嚴重。美國國務卿訪華，雖然連習大大都見咗面，但中美雙方會面後未見聯合聲明，雙方關係只能算打破僵局，但談不上完全破冰。由於內地經濟表現於開關後，復甦不似預期，經濟面未能支持人民幣強勢，人仔喺上周五反彈後，周一又回復跌勢。

內地國常會結束，未見有任何重大刺激經濟政策出台，618購物節成績未見突出，噚日ATMJ開市未幾即下跌，跌幅全線超過3%，之前一直強勢嘅快手(01024)更跌半成。下半場傳出習大大將會見布林肯，港股由低位反彈，呢啲重磅科網股跌幅亦收窄，帶動港股跌幅削半。

618購物節成績如何，喺各電商未有公布銷售金額下，大家都心中有數，應該唔會好得去邊，否則早已打鑼打鼓，高調宣布銷售數字。相比喺疫情之前，每當有呢類銷售推活動，唔使十個八個鐘，又話打破去年銷售紀錄，近呢三年已再無呢支歌仔唱。

不過大行對電商股都算客氣，指目前內地消費力弱，電商平台銷售產品以平價貨為主，總收入有啲啲增長都已超過預期，表現唔錯，繼續睇好。不過報告睇好還睇好，但身體最誠實，噚日未見資金入場掃電商股，主要係官方無實際銷售數據公布，大行報告都係避重就輕，電商實際整體營收表現如何，市場一清二楚，當然唔會賣賬，尤其電商如京東(09618)大灑金錢補貼進行推廣，即使谷得起個銷售額，但薄利都未能多銷，拖累整體盈利表現，電商補貼戰難以持久，相關股份經過一輪反彈後，市場面對618購物節亦不感興趣，未見資金入場追貨。

恒指噚日回吐逾百點，但收市跌幅已較盤中低點跌幅削半，雖然未能企穩20000大關，但暫時守住19800關都算係咁。不過成交額又回落至1030億元，反映場內資金面薄弱，買盤未見積極，大市都係由期指主導，指數上上落落炒波幅。人民幣雙櫃台買賣，雷聲大，雨點小，呢個都係古天后意料中事。講嚟講去，港股由18000水平反彈至今，一直未見資金配合，除咗係技術反彈同挾淡倉外，講唔上係乜嘢回復強勢。留意反彈未能企穩100日線，若再失250日線及50日線，本輪反彈好大機會結束，只係6月份好友得勢，未必會放過淡友，回調至19500水平或者又守住，假如去到期指結算後，仍未有任何好消息配合，唔排除大市再次調頭向下，坊間唔少聲音指上月低位已見咗全年低位，似乎係有啲過份樂觀。