張致恒欠債多時終於蒲頭道歉 求公眾放過老婆家人

早知今日。

被追債，Steven一直「龜縮」，直至昨晚先肯蒲頭，喺社交網就欠債一事再認錯，強調冇走數。

張致恒（Steven）債台高築，傳借咗超過40萬街數，欠債禍及妻兒，搞到老婆雯雯(區燕雯)近日被起底，壓力大到爆煲，揚言：「放棄都唔會帶兩個仔！」被追債，Steven一直「龜縮」，直至昨晚先肯蒲頭，他喺社交網貼上一張藍天白雲相，就欠債一事發長文，除咗再認錯，強調冇走數、冇着草，𠵱家默默地工作，會好努力咁去工作，盡快還晒啲錢畀大家，更跪求放過他家人。

大人唔食細都要食，Steven𠵱家努力工作養家及攤還欠債。

自2019年奉子成婚，被爆一腳搭5船後形象大插水，身敗名裂，靠借錢渡日，月前更被指搬竇避債，舊屋信箱塞滿追債信。借錢唔還兼失聯，搞到債主之一嘅馮鎵瀠（Naomi）嬲到爆，要公開追債。可是，Steven成個月都未有就追債事件表態，反而靠老婆雯雯挺身打同情牌，喺社交網貼文話，經已去到絕路向財務公司借錢冚債，澄清未有玩消失走數，他們一定會還錢。不過，雯雯承認要照顧兩個仔及屋企，現金只係得$200，壓力大到爆煲。

Steven就拖數事件再向債主道歉。

雯雯日前貼文自爆，現金只係得很$200，壓力大到爆煲，好彩有阿媽力撐。

Steven要照顧一家人加埋愛犬，生活逼人。

昨晚張致恒眼見累及太太被起底，終於識得保護妻兒，喺社交網站現身發聲，並指自己已找到工作，他說：「Hello，大家好我係Steven張致恒，首先好多謝大家嘅關心，我想喺度重新(申)講多次，我冇走數我冇着草，我依(𠵱)家只係默默地工作，一直都好想還晒啲錢畀我所欠嘅朋友，講真喺呢段時間真係過得好辛苦，搵到錢返嚟，我係有還過畀我嘅朋友，只係未完全還晒，我明白喺依(𠵱)家呢個時勢大家都好窮，所以我會好努力咁去工作盡快還晒畀大家，想喺度同我嘅朋友講聲對唔住，拖你哋咁耐。」

借錢唔還兼失聯，搞到債主之一嘅Naomi嬲到爆，要公開追債。

對於雯雯壓力爆煲，他就將責任攬晒上身：「仲有嘅就係，因為我嘅原因令到老婆嘅情緒唔好，所以我懇請大家要鬧要話嘅，可以私訊同我講，我好樂意畀你哋鬧，希望大家唔好再私訊我老婆，佢要幫我照顧兩個小朋友已經好大壓力。」

有指雯雯出身紋身世家，外公相當猛料，曾為吳志雄、陳惠敏操刀，Steven跪求放過家人：「仲有希望各位記者朋友可以高抬貴手，你寫我乜嘢都唔緊要，因為我係公眾人物食得鹹魚就要抵得渴，但係我老婆嘅家人都係普通人一個，其實點解仲要攞出來講呢？若果有一日你全家嘅成員，俾人擺出嚟你又會點諗呢？阿婆幾十歲心血少唔嚇得，同埋阿公已經過咗身，希望大家尊重阿公，跪求大家體諒！」

張致恒有工返無錢收？

有「離婚界KOL」之稱的張致恒（Steven）和區燕雯（雯雯）婚後育有四名兒子，兩公婆經常在社交平公開家事，一家又長期經濟困難，但近期張致恒似乎終於生性，不時在IG分享打工生活，日前舉家為大仔張天寶慶祝5歲生日。不過，雯雯今日（4月16日）突然出PO，自爆屋企被cut電，直言：「完全已經唔係容忍嘅範圍之內！」

張致恒早前不時在IG分享打工生活，似乎終於決定腳踏實地。

一家人日前齊齊出動為大仔張天寶慶祝5歲生日。

張致恒寄語囝囝：「努力做人，讀唔到書唔緊要最緊要做一個開心嘅人，做個善良嘅人，千祈唔好好似daddy咁失敗，所有嘢都一事無成！」

雯雯在IG Story以黑底白字留言：「要發生嘅，終於都發生，你終於都令到屋仝發生俾（畀）人CUT電，完全已經唔係容忍嘅範圍之內！小朋友又冇得煮嘢食，又冇熱水沖奶，不停喊，請問你想我點？！」根據雯雯以往經常在IG公開鬧爆張致恒，估計今次文中的「你」亦是指張致恒，令人疑惑他們一家的經濟狀況，張致恒是否仍有打工？

雯雯又公開指責張致恒？

此外，雯雯今年2月突然自爆有一名兒子患自閉及過度活躍症，「坦白講照顧呢類小朋友， 無論係身心情緒都係好大嘅學習，我一個人真係冇能力，同一時間可以照顧到四個小朋友，應該話可以照顧到，但係會有一定嘅危險。」又稱兒子曾跌倒傷耳，「醫生同我哋講呢類小朋友，一年起碼會去幾次急症室要有心理準備，而家每一日面對佢嘅行為情緒都係一個好大嘅挑戰，同時因為屋企其他嘅小朋友仲好細，亦都會受到影響，我哋亦都要好努力學習點樣可以得到一個平衡」，更坦言壓力已接近爆煲，引來不少網民關心，直到張致恒早前在IG分享為大仔張天寶慶生的照片，並留言：「想當日仲趴喺我心口度瞓覺我喺度打機，而家百厭調皮直情係一隻馬騮」，惹來網民揣測患自閉及過度活躍症是大仔，事後他與雯雯今日分別在IG Story澄清，貼出同一張大仔的照片，並留言：「我想澄清番，天寶係冇自閉」。

雯雯曾發長文解釋兩公婆不能出外工作的原因，其中一個原因就是有一個囝囝確診自閉及過度活躍症。

澄清大仔沒有患自閉證。