被質疑「乜水」冇所謂 阿Jer澎湃使命感：請支持香港樂壇

阿Jer承認得獎後「有使命去做多啲嘢」。

本周香港樂壇再成熱話，上年度最後一個頒獎禮《Chill Club》日前圓滿落幕，除林家謙奪6獎成大贏家，MIRROR及成員亦共奪8獎，當中阿Jer（柳應廷）除憑歌曲《迴光物語》打入十大，再得新人獎，連同叱咤、新城同港台奪獎，成為樂壇新人王。不過阿Jer成績唔係每個人認同，曾被質疑「你係乜水唔識你呀！」不過他睇得好開，仲覺得新人有人唔識好正常，唯冇靠音樂證明實力。早前阿Jer唱《樂壇已死》中「香港歌手不會死」一段，被指帶起樂壇革命，阿Jer承認得獎後「有使命去做多啲嘢」，既然MIRROR多人注意，要令更多人留意香港樂壇，睇番頒獎禮，聽多啲廣東歌。

阿Jer認為得獎後多了份使命感，希望令廣東歌樂壇可以變得更好。

《Chill Club》頒獎禮得獎後，阿Jer表示，「今年成績好好，自己好開心，有好多係意想不到。上年做《物語》三部曲純粹為音樂meaning，冇諗過攞啲咩獎，得到大家支持同鼓勵，係好開心嘅，獎項只係bouns，最緊要嗰三首歌曲畀到力量唔同朋友，嚟緊目標都係再做多啲好歌，畀多啲能量大家，或者將一啲新朋友帶入嚟畀大家欣賞，好似同我合作新歌《狂人日記》嘅吳林峰，佢本身係個好好唱作人，希望大家關注我哋同時，都關注香港新一代音樂人，佢哋每位都好畀心機去做，佢哋嘅音樂好值得被關注，希望樂壇可以百花齊放，大家都睇番頒獎禮，聽番廣東歌，支持番我哋廣東歌樂壇啦！」

阿Jer在《Chill Club》頒獎禮，奪得「年度新人獎」。

早前有指「樂壇已死」，音樂人王雙駿、小克和吳林峰即創作歌曲《樂壇已死》反擊，更搵來新一代歌手大合唱，去年得獎後曾被質疑的阿Jer亦有份獻聲，他認為演繹時沒想太多，但確實很想推動廣東歌樂壇進步，「「我上年做完《物語》系列後，去到年尾大家都話『你係乜水呀！唔識你呀！』我不嬲覺得自己係新人，有人唔識係好平常，我咪盡力做好我嘅作品，令到多啲人認識我。去到上年出咗《樂壇已死》呢首歌，我唱完『香港歌手不會死』大家都話『Jer，你好似帶起咗個樂壇革命，你令到大家聽番廣東歌，你好勁！有個使命感！』我去做呢件事時過程又冇諗咁多，呢首作品Carl叔叔（《樂壇已死》監製王雙駿）好想我喺嗰個位出現，我咪做囉！但都想慢慢推動到廣東歌樂壇再進步，多啲人去留意番，呢個一路係我做歌嘅宗旨！想將更多元素音樂帶入廣東歌度，呢樣我冇變過。」

阿Jer在《樂壇已死》負責演繹「香港歌手不會死」一段。

有人形容將會是MIRROR時代，阿Jer坦承得獎後多了份使命感，加上MIRROR人紅更應該為樂壇出多份力，「既然MIRROR每位成員都咁多人留意，我哋都有個使命去推動一啲嘢，例如香港裏面有好多創作歌手都好好，希望大家了解MIRROR之外，去嘗試接觸其他音樂，自己覺得有呢個使命，身邊我覺得有Talent嘅朋友盡量會搵佢哋合作。」

阿Jer認為MIRROR現在高人氣，應該為樂壇多出分力。

雖然已貴為樂壇新人王，但阿Jer製作新歌《狂人日記》時也有一定壓力，「我初頭有嘅，我製作完呢首歌準備出街嗰個禮拜，成班製作人話唔知首歌反應點，始終係首比較新音樂類型嘅歌曲，大眾口味未必會接受，過咗兩個禮拜，大家反應係『阿Jer你做到首咁正嘅歌』慢慢個信心提升咗，自從上年我經過咗頒奬禮，《物語》系列後，對自己音樂製作係大信心咗，無論係舞台上表演，同埋去演繹歌曲。我將自己鍾意聽嘅音樂擺喺我嘅歌曲度，原來大家都鍾意，經過咗《狂人日記》我更加放膽去做自己想做嘅音樂，我唔會理大眾鍾唔鍾意聽啦！我淨係做我自己鍾意嘅音樂。」

阿Jer新歌《狂人日記》rock味十足，是向偶像樂隊Queen致敬之作。

阿Jer跟音樂人吳林峰先後合作《迴光物語》、《樂壇已死》及《狂人日記》。

阿Jer坦承作為新人，預了一定有人唔認識，所以唔會介意。

講到製作新歌《狂人日記》，阿Jer勁興奮大讚製作過程超好玩，當中飆高音被樂迷認為夠晒癲，原來是他錄音時神來之筆，「寫呢首歌嘅時候冇話一定要我騷唱到幾多高音，但尾句有個高音，我錄音時feel free加落去，呢個位嚟一個高音，咁先夠癲嘛！橫跨16度喎！但以為好狂嘅時候，去到呢段我就靜落嚟，你就捉我唔到啦！

阿Jer自言平日唔會太癲，只限在音樂及玩遊戲時大家才見到這面。

阿Jer曾表示家人很支持他追夢，柳媽媽還跟他玩埋一份。

Jer柳應廷高唱我行我素走我路！

由推出第一首單曲《水刑物語》開始，柳應廷Jer就一直在創作與主流音樂作品迴異的歌曲，每一首歌曲為樂迷帶來驚喜的同時，有時亦會予人怪誕感覺。不過Jer卻覺得怪誕都有其獨特魅力，就好似他的偶像導演添布頓Tim Burton，受人愛戴追捧，而新歌《筆觸男孩憂鬱之死》，就是唱出Jer在音樂創作路上的心聲。

柳應廷（Jer） 以怪誕造型拍新歌《筆觸男孩憂鬱之死》MV。

Jer鍾情添布頓的作品，今次《筆觸男孩憂鬱之死》的創作靈感，也來自添布頓。Jer道：「我好喜歡添布頓創造嘅世界，不論畫作還是電影，荒誕得嚟又帶有獨特嘅魅力，《筆觸男孩憂鬱之死》就係由佢畫家同導演呢個角度去切入：無論你係乜嘢人，只要相信自己，堅持做自己覺得啱同開心嘅事，最終會建構到屬於自己嘅世界。」Jer深信，不論做任何作品，只要堅持自己，到後來回望，就會見到由自己一手打造，屬於自己的音樂路。

受導演添布頓影響。

堅持創作信念。

所以今次《筆觸男孩憂鬱之死》，Jer便找來全新班底合作，包括作曲的T-Ma及填詞的鍾說，來個新嘗試，Jer很喜歡這個組合，道：「 T-Ma好快就諗到好得意，市面上又唔多見嘅旋律，至於鍾說，我哋傾歌詞內容時，都不其然講起尊尼特普（Johnny Depp）同添布頓，於是我哋就諗到不如用畫家角度，唱出我嘅想法。」鍾說特別在歌詞中加入了一些添布頓電影的元素，大家聽歌時可以細心發掘一下。

新歌高唱我行我素走我路。

既然歌詞裡面出現了添布頓的元素，今次MV也就順利成章，讓Jer以怪誕造型演出，Jer介紹道：「我好鍾意電影《怪誕屍新娘》（Corpse Bride），所以MV其中一個黑白間西裝造型，靈感就係來自電影裡面嘅主角Jack，而我身上嘅玩具：恐龍、權仗、車、玩具珠寶等等，其實代表每個人內心嘅慾望。除此之外，我個妝就好似一個畫家喺我塊臉上面繪畫，畫咗唔同嘅彩繪。」而Jer飾演的瘋狂角色，就是一位創造家，在甦醒帶大家參觀他所創造的地下收藏室。Jer繼續介紹MV道：「其他角色嘅眼耳口鼻都畫喺唔同地方，呢啲都係我所創造嘅人物。喺收藏室裡面，每通過一度門，就好似帶聽眾逐步深入我嘅收藏世界。」

Jer帶大家走入怪異世界。

添布頓被形容為怪誕導演，那麼Jer也是一個怪誕的人嗎？他親自解構道：「我都係一個怪怪地嘅人，因為我鍾意玩，行為有時都有啲怪異，例如成日大叫、暴走，打牌自摸都會咁，我有時都控制唔到，玩起上嚟就會好癲，所以我唔驚『怪誕』呢個形容詞，亦唔覺得陌生，只要自己開心Enjoy就得，實行用自己魅力感染人哋。」

Jer以怪誕造型演出。