長期唔識釋放情緒 馮盈盈壓力爆煲拍《逆天》喊戲緊張到瞓唔到

要好好調整情緒喎！

做演員投入感情難，識抽離一樣唔易，壓力有時會大到爆晒煲！馮盈盈最近參加《好聲好戲》，為劇集《巴不得媽媽》配音時喊到豬頭演繹，不單得唔到原本演該角的汪阿姐歡心，指她用錯感情，評判王祖藍更狠批「我好擔心你適唔適合做呢行」、「你嘅壓力蓋過你嘅實力」。其實每次演戲盈盈都畀自己好大壓力，舊年《反黑路甲人》已自爆因壓力，情緒失控收工仍狂喊，而她拍熱播的《逆天奇案》時，原來都試過對住視帝陳展鵬拍喊戲，壓力太大緊張到瞓唔到。

盈盈在《好聲好戲》為劇集《巴不得媽媽》配音時，比起汪阿姐原裝演喊得更勁。

祖藍鬧盈盈長期唔識釋放情緒，她拍《逆天》更壓力爆煲，搞到拍喊戲前瞓唔到。

啱啱播完的《好聲好戲》順利由表現穩定的陳自瑤奪冠，而出名懶音勁的馮盈盈雖然年前搵前報幕員羅山教正音，懶音情況改善咗好多，但依然落敗，全因畀自己太大壓力，完全控唔到情緒，汪阿姐都評她，「你感情係好豐富，但好似有少少用錯咗。」祖藍除了狠批她「我好擔心你適唔適合做呢行」、「你嘅壓力蓋過你嘅實力」更爆她為了這場戲配音，竟然由早上開始喊到錄影，其間搞到生人勿近，更指「你嘅壓力大到我都有壓力」，仲話令他懷疑自己應唔該搞呢個節目。

祖藍更狠批盈盈，「我好擔心你適唔適合做呢行」。

配完音盈盈仍喊到收唔到聲，祖藍指她唔識收起情緒「壓力蓋過實力」。

其實盈盈演戲時唔識釋放壓力都唔係第一次，舊年8月播出《反黑路人甲》，盈盈接受《頭條》訪問時，就自爆首度擔正女主角畀自己超大壓力，搞到拍喜劇竟然戲裏戲外都爆喊，「大家開心睇喜劇嘅時候，其實我係喺鏡頭前不停喊，返到屋企背人就流淚啦！喺現場對自己有更大期望又忍唔住喊，唔知係咪我對呢套喜劇太投入，係拍劇以嚟喊得最多嘅一次。」

盈盈拍《反黑路人甲》時，已出現控制唔到情緒情況。

講到最近的新劇《逆天奇案》，盈盈一樣畀壓力影響住，首度去泰國北碧府拍外景，面對陳展鵬演喊戲已搞到她超緊張，「最難忘嘅一場戲，喺泰國嘅外景，講我哋喺條火車橋上面，喺日出初起嘅時份，我同展鵬一場好重要嘅情感戲，我又喊佢又眼濕濕，總之好似攤牌咁嘅嘢，拍嘅時候要就埋個日出喺後面，晨早4點要到現場，你估我要幾點化妝！？冇瞓咁滯，前晚又好緊張講到場戲咁重要！」

在泰國北碧府火車橋拍這場喊戲，搞到盈盈緊張到瞓唔到。

為了要拍到日出背景，劇組要晨早到現場開工。

盈盈坦言日出時間太短，要一take過完成唔容易，「工作人員好早去set晒嘢，又特登截住條橋，嗰條橋係有火車經過，喺外地拍攝時間好緊迫，所有嘢都係錢嚟，咁多人力物力好龐大，嗰吓表演要好準好到位。成唔成功？係成功嘅，出嚟個話面仲好靚，有晒景同火車，喊得出真淚水嚟唔係眼藥水嚟。」盈盈又爆另一個緊張位是怕阻住人收工，「嗰場戲係泰國外景最後一日，嗰日展鵬拍完就走得，Phoebe（太太單文柔）都過咗嚟探班，展鵬book晒之後同老婆去曼谷開開心心玩，如果我喊唔出，就耽誤咗時間，阻住人哋去旅行玩都有啲壓力嘅。」

盈盈笑指怕阻住陳展鵬收工，因單文柔當日都有到場探老公班。

懶音改善咗盈盈，更自爆終於夠膽搵譚嘉儀學唱歌，「我喺選美之後都有學過唱歌，但係好快放棄咗，因咬字未搞掂，唱容祖兒《世上只有》第一句就係『望着你講』，4個字有3個字好難，唱咗一個月都仲係呢四個字，好灰心放棄咗，依家就唔使咁多心機去搞掂字，可以學吓啲keep到啲音準同拍子。」不過她預告會挑戰鄭欣宜首《@princejoyce》，「中間都難有啲位好高音㗎！希望大家可以期待吓我個成果唱成點啦，最難係個beat，希望出到嚟唔會變笑片。」不過盈盈學正音同唱歌之餘，似乎更加需要學好演技，學祖藍話齋情緒能收能放先至算係好演員。

盈盈年前搵前報幕員羅山教正音，懶音情況改善咗好多。

除了這場戲難，今次《逆天》盈盈為了來自委內瑞拉的駭客「Ana」角色，要連學多種語言，「呢套劇簡直係考我語言天才，話我喺外國返嚟同外國人又要講英文，要講到好似外國返嚟ABC咁，仲要學西班牙文又要唱埋歌，講我搵咗位尼泊爾朋友，去到拍攝現場又要加幾句尼泊爾文，即場跟住學要好流利好地道，仲有學泰文，因為去泰國拍外景，我同嗰度啲人溝通係講泰文，仲要識跳埋佢哋啲民族舞，我練咗幾堂先至飛過去，所以我為咗呢套戲學咗好多新嘅語言同新技能，好似去咗個訓練營係度挑戰自我。」

盈盈笑指今次《逆天奇案》角色「Ana」，聰明機智又大膽同自己幾相似。

劇集《逆天奇案》中，盈盈飾演來自委內瑞拉的駭客「Ana」，打扮性感又大膽。

拍完《逆天》外景，盈盈都有留在泰國度假。

盈盈為《逆天》學了多種語言及技能，包括：西班牙文、尼泊爾文及泰文，還要學跳泰國民族舞。

《福祿壽訓練學院》本周日第四集將開始將進入競賽模式，福隊、祿隊同壽隊會分三個回合比併，並根據最終名次決定每隊需要淘汰人數。

由阮兆祥、李思捷、王祖藍主持的香港首個扮嘢真人Show《福祿壽訓練學院》本周日（4月28日）播出第四集，將開始將進入競賽模式，阮兆祥、王祖藍及李思捷率領的福隊、祿隊同壽隊會分三個回合比併，並根據最終名次決定每隊需要淘汰人數。為令觀眾在競賽正式開始前對24位學員有更深入了解，製作組今日（4月22日）公開 24名學員個人Profile；根據發布資料，三位導師各自擁有一名「最強武器」。

阮兆祥福隊。

王祖藍祿隊

李思捷壽隊

先說祥師兄的福隊，學員有「臨時郭富城」彭建豪、黃建東，及趙頌宜、伍韻婷、「扮聲勁過李思捷」林樂熙、莫家淦、「廣州暴龍哥」陶大衛、周百恩。福隊特色是坐擁兩名最強「撞樣學員」彭建豪及陶大衛。

與郭富城有八成半相似的彭建豪，演出足跡便遍及美國、加拿大、馬來西亞，及新加坡等，至今登台表演場次超過5千場！彭建豪更有不止一次與真．郭富城同台，更獲安排在本尊面前表演；曾遭網民笑指比「鄭中基更似鄭中基」的陶大衛，從事汽車銷售接近20年，誤打誤撞進入短視頻圈後開始轉營及走紅，在內地流媒體視頻全網播放過億，其中模仿鄭中基Tone獻唱經典金曲《青春痘》勁吸7.4萬Likes及1.2萬次轉發。另早前陶大衛還專程來港到真．鄭中基演唱會朝聖，兼把握機會合照留念。

福隊中潛藏的是「聲音模仿系」達人、只有21歲的林樂熙。現於香港理工大學主修食物安全及食物科技的樂熙，個人Profile中列出了超過66項「聲仿名單」，是24名學員之冠。除有藝人系列，還有唐老鴨、動物雀鳥系、死物系及動作系等。年紀輕輕的樂熙，還擁有三年兼職流行鼓導師經驗。

祖藍的祿隊，學員有「Lowbud大熱」趙亮昭、「人肉變聲器」湯卓堅，以及麥嘉欣、「新會華Dee」陳柏曦、鄭詠謙、「還珠攻略」王玲、吳兆麟、劉倬昕。祿隊的特色是盡收最靚仔及最靚女於一隊，正是柏曦及嘉欣。

26歲的麥嘉欣是澳門聖約瑟大學臨床心理學學士，演藝經驗豐富，作為2017年國際小姐澳門代表的她，曾參與內地多個春晚及中秋晚會演出。嘉欣搞笑地在個人簡介自揭是表裏不一的女生：「可能大家都會覺得我係斯文嘅，但其實我都幾粗魯，而且有好多位都比較男仔頭，例如鍾意睇打拳、揸車，又會戙起隻腳食飯等等。」

有「男神混合體」之稱的柏曦，聲仿能力及歌唱實力均不容忽視，曾是《全民綜藝大舞臺》兩屆亞軍之餘，亦是新會廣視第一屆歌唱大賽冠軍。柏曦接觸抖音之前曾是一名IT人，感性與理智俱備。

祿隊的「實力擔當」則落在可模仿超過20款人聲的湯卓堅，曾任《中國好聲音》2023年度廣東省賽區評委，並同時擁有超過 18 年聲樂和超過8年爵士鼓教學經驗，手下不乏「冠軍級」學生，更會作曲及填詞。

思捷的壽隊，學員有葉泓聲、黃潤成，以及「大灣區梅姐」林妍、「許志家駒」馮彥中、郭浩皇、「行走的CD機」梁山山、蔡景行、關嘉敏。思捷隊的特色，是雲集兩大舞林高手葉泓聲（Gordon）及關嘉敏（Carmen）。

跳舞組合《天堂鳥》出身的Gordon跳舞了得不容置疑，曾以女子跳唱組合出道的Carmen，還是中國舞教師、懂得藝術體操、打功夫、吹色士風，甚至紫微斗數。壽隊的實力擔當落在「閱歷王素人」馮彥中身上！

由於聲線及外形與家駒相像，彥中在第三集《福祿壽訓練學院》中獲安排獻唱向家駒致敬，該條短片單計無綫官網社交專頁，Like數達9,401（截止周日深夜12點），觀看次數則衝破87.2萬，成為「Top Reel學員」第二名，「Top Reel 學員」第一名是柏曦，首輪演出短片Like數高達2.1萬（截止周日深夜12點），觀看次數衝破167萬； 「Top Reel學員」第三名是麥嘉欣，首輪演出短片Like數4,329，觀看次數衝破83.8萬。

「Top Reel 學員」第一名是陳柏曦。

第二名是馮彥中。

第三名是麥嘉欣。

說回彥中，年屆47歲的他本身是音樂狂熱份子，尤其擅長搖滾音樂及音樂創作，曾於Cash頒獎禮中獲取獎項及肯定；為了平衡生活及追夢，彥中一度成為「兼職達人」，就連「商舖臥底」也做過，經歷有趣。