方力申恨做爸爸未有結婚對象 王菀之自薦做媒人

希望Ivana成功幫到小方！

王菀之（Ivana）和方力申（小方）日前擔任星級義工，為「麥當勞叔叔之家慈善基金」在7月1日至8月25日舉辦的慈善獎券義賣活動拍攝宣傳照。當日兩人同3歲小妹妹一齊拍攝，見他們○氹小朋友有一手，菀之笑言自己也是大細路，又自言未確定準備好做媽咪未，而好肯定準備好做爸爸的小方，就未有結婚對象，睇唔過眼的Ivana即場自薦做媒人。

Ivana和小方同3歲小妹妹一齊拍攝，完全冇難度。

Ivana主動自薦做小方媒人，打算介紹女仔給對方。

小方望住小妹妹個樣勁冧，爸爸樣出晒嚟。

由於疫情關係拍攝宣傳照沒法在「麥當勞叔叔之家」進行，Ivana和小方未有機會探訪一班病童，不過原來疫情前Ivana已經常去探訪，而且被他們的正能量感染，「你以為佢哋病會好小心，但佢哋其實好活潑，拮晒針應該好痛，佢都照樣跑來跑去，佢哋嗰種活力同埋生命力，反而啲大人入到去好似滿佈塵埃咁樣。」

Ivana在疫情前到「麥當勞叔叔之家」探訪。

見Ivana和小方都好識○氹小朋友，Ivana自言內心都是個小孩，「我自己本身係屋企都喺咁同啲公仔溝通，我只係見到個friend咁啫！唔覺得係一個大人○氹緊個小朋友。」問到是否已準備好做父母？小方坦言一直都ready，「我覺得我係個好好嘅老竇嚟，但係生仔佢死緊，一定會好嚴，但係女仔嘅話我諗會軟好多，可能同個未來太太講『你出去搵錢啦我喺屋企煮飯湊仔』，唔做嘢攬住佢哋算。」Ivana坦言10年前最想做媽咪，「可能同荷爾蒙有關係，好早有諗過，但過咗又冇諗，有時見到啲朋友，就會諗一諗。」

Ivana與蘇卓航於2015年結婚後一直恩愛。

有一顆童心的Ivana，𠱁小朋友有一手。

小方恨做爸爸，可惜仲未有結婚對象，玩交友Apps又未有成績，「我其實都係得個睇字，冇行動，梗係唔敢啦！疫情底下係難啲，同埋我本身係難識朋友嗰啲人。」Ivana睇唔過眼話：「我啲好姐妹有個list嘅，我打畀你啦！（你終於出手啦！）我明佢，有時好似我啲好姐妹朋友，係要人介紹吓可能會好啲㗎！」小方再補充，「好似我細佬做律師，有時做到凌晨，你點識人啫！唔好話藝人唔知點樣識人，佢哋都會唔知點識啲新朋友，所以介紹係需要囉！」叫Ivana快點出手，她即搞笑答：「知道！」

小方近年經常湊契仔，學識跟小朋友相處。

真兇揭盅！

由劉家豪總監製、陳志江監製、岑國榮、孫浩浩擔任編審的《逆天奇案2》，逢周一至周五晚八點半翡翠台播映，主要演員包括陳展鵬、林夏薇、馮盈盈、黃智賢、蔣祖曼、張頴康、劉佩玥、方力申及高鈞賢等。

姜大衞偷走龍頭棍嘅原因，身為佢代表律師嘅蔣祖曼已經估到晒。

姜大衞偷走龍頭棍嘅原因，身為佢代表律師嘅蔣祖曼已經估到晒。

姜大衞偷走龍頭棍係希望一家人可以移民去其他地方，畀乖孫可以喺一個健康快樂嘅環境成長。

昨晚（5日）一集單元「龍頭棍風暴」完滿落幕，偷走龍頭棍的真兇正是賀堅（姜大衞John哥飾）本人，目的原來是為了孫仔！賀堅不欲黑社會背景影響到乖孫的成長，因此設計一場大龍鳳將龍頭棍偷走，欲打退兒子賀永權（林景程飾）爭做龍頭的野心，希望一家人移民外地展開新生活。可惜永權被權欲熏心執意爭做龍頭，與死對頭耀星（翟威廉飾）鬥生鬥死，兩人在貨櫃場打大出手，永權更差點取了耀星的性命，最終森Sir（陳展鵬飾）趕到現場成功阻止悲劇發生。

林景程與翟威廉的打鬥戲雖然只有約1分半鐘，但拍攝過程絕不簡單！官方釋出相關場口花絮片段，翟威廉拿刀揮斬景程時，屋頂其中一塊天花意外落下，並狠狠擊中威廉的額頭，幸好威廉並沒有大礙，休息一會便重新投入拍攝，非常專業。拍攝當日正值33度高溫，穿着長袖的兩人不但要奪命狂奔，還要瘋狂埋身肉搏，兩人賣力演出拍到身水身汗，認真唔簡單。

相關影片可以按以下畫面觀看：

影片連結：

林景程同翟威廉大打出手，仲差啲錯手殺死對方，幸好展鵬及時趕到阻止事情發生。

翟威廉喺呢場打戲不慎被假天花擊中，好彩最終冇事！

雖然拍攝當日天氣好炎熱，但係林景程、翟威廉都係好賣力演出。

劇中主演的感情線亦是《逆天2》的看點之一，昨晚一集劇情適逢是情人節，Nic Sir（黃智賢飾）和Hazel（蔣祖曼飾）翻撻後首度過情人節，溫馨甜蜜滿瀉；與阿Wing（飾）分手的森Sir眼見街裏愛人一對對，自己卻形單隻影自隊雙餸飯，不禁黯然神傷！另邊廂，阿Wing與天才生物學教授唐冠峰（方力申Alex飾）在大學中邂逅，冠峰駕車載穎思一程，期間兩人大談愛情觀，冠峰認為愛情根本不存在：「大腦分泌出愛情感覺，大概會喺一年半到三年之後，呢種感覺就會消失，但係呢段時間足夠畀人類完成兩性結合同生育，愛情只係基因繁殖機制。」阿Wing則不太認同：「我覺得除咗基因繁殖之外，人類之間仲有陪伴同埋承諾，呢啲都包括喺愛情。」冠峰聞言再拋下大量學術術語反駁她，雖然直男指數爆晒標，但阿Wing對冠峰似乎有特別的感覺！

情人節有人開心有人愁，甩拖展鵬自隊雙餸飯。

蔣祖曼同黃智賢就Sweet到震。

飾演天才生物學教授的Alex的角色理性大於感性，事事都以科學理論來解釋，甚至於覺得「愛情」都是假的，Alex將角色的「直男特質」演繹到位。Alex受訪時透露靠幻想代入角色：「角色細細個就被老竇帶去荒島做科研，童年淨係得讀書同做研究，我嘗試用屋企嘅情況套番落角色，如果我老竇淨係同我講運動，搬去一個地方淨係練水，日日都係咁練，我都會感受到呢個痛苦，用呢個感受代入番個角色。」講到劇中要面對大量繞口劖手的專業術語對白，Alex透露獲視后檔林夏薇傳授秘笈：「薇薇教我可以錄低再翻聽，呢個方法啱晒我，因為每日都要揸成個幾鐘頭車，呢個方法好處係去到邊都可以聽，好似聽廣播劇咁，仲有可以聽番覺得演繹得好唔好，如果唔鍾意呢個方法就再錄過，確實幫咗我好多。同埋劇中有好多專業術語同埋英文，所以事前都要做足Research。」

劇中Alex直男指數爆晒標，問到他現實中的愛情觀時，他笑言：「感情方面唔係好識講。我覺得人大咗就會體會到，你覺得自己做得好時，可能人哋會覺得唔好，最緊要係對方覺得你係稱職嘅伴侶先係最緊要。」劇中Alex不時會大顯廚藝，問到現實中有否和女友玩煮飯仔？他笑謂：「大家都好忙冇乜時間煮嘢食，同埋對食嘢嘅要求都好易滿足，煮熟就得。」

方力申喺劇中唔相信世上有愛情，一切都只係化學作用。

小方劇中有唔少繞口對白，全靠薇薇傳授佢背對白大法。