王敏奕對得住自己預左有是非 兩年拍四劇唔關曾志偉事

工作上同老爺冇關。

娛樂圈出名是非多，靠人事關係上位，絕對是最佳材料俾人大講特講。早前曾志偉重返TVB擔任副總經理兼行政委員會特別顧問，手執大權，最近在新劇《刑偵日記》擔正的新抱仔王敏奕，近期又劇接劇，難免成為人話柄，敏奕亦有晒心理準備，但認為對得住自己就夠，「人哋講好難去避免，始終我哋有一個關係喺度。」不過她早前被何哲圖睇中簽約「星夢娛樂」做埋歌手，而有傳何哲圖跟曾志偉不和，她即搞笑趁機澄清工作方面好獨立。29歲仲未想生B的敏奕，又指就算老公曾國祥也少有畀工作意見。

敏奕坦言在事業上仍有追求，對於生小朋友未有計劃。

敏奕繼《香港愛情故事》演大膽的「Shay」獲好評後，最近在《刑偵日記》演職業冷門的法醫人類學家「方菀芊」（Dr. Fong），跟黃智雯各自愛上多重人格的王浩信其中一個人格，最有趣兩女不但冇競爭仲和平共處，挑戰觀眾底線。她形容角色是個很簡單女仔，「當佢了解個男仔有咁嘅狀況，亦都冇問太多，冇話要爭，反而同另一個女仔講，不如一三五我叫佢出嚟，二四六你去同佢一齊。」

敏奕在《刑偵》中演法醫人類學家「方菀芊」（Dr. Fong）。

《刑偵》中敏奕愛上患有多重人格的王浩信。

曾國祥所受壓力更大

劇中敏奕跟黃智雯同樣愛上王浩信，但兩人未有因而反目。

19年，敏奕跟曾國祥在日本結婚，正式成為曾志偉新抱。

近期敏奕可謂劇接劇，繼先後播出的《香港愛情故事》及《刑偵日記》，仲剛拍完的《把關者們》，以及剛開拍《旁觀者》，而恰巧老爺曾志偉今年1月重返TVB做高層，難免令人聯想到靠人事上位，她坦言有晒心理準備引發是非，「佢喺呢行咁犀利，好多嘢好難冇佢份，甚至乎我16歲人生第一套拍嘅電影《烈日當空》，佢都係監製，啲人都講番轉頭，由嗰刻開始好難撇除一個關係，尤其是大家係屋企人，冇得唔關我事，變咗自己努力做好自己嘅嘢，亦都好彩就係《香港愛情故事》係播咗有一個認受性嘅，之後《刑偵日記》喺《香港愛情故事》拍之前已經同我傾咗，同一個監製搵我再拍《把關者們》，所有嘢起碼我對得住自己，知道呢啲嘢係我努力成果，自己爭取返嚟，自己做自己嘢就好足夠，人哋要講好難去避免，始終我哋有一個關係喺度，如果要咁講點都講到。」她坦承老公曾國祥所受壓力更大，「佢更加係一個好好嘅例子，佢由細俾人講到大，到𠵱家仲係有人講㗎！」她笑言老公一句：「我都係咁啦！好少事！」已令她減壓不少，「互相明白個壓力，始終呢行有唔同角度俾人講都好難避免，唔講你呢樣就講你嗰樣㗎啦！希望好嘅嘢俾人講得多啲，蓋過畀啲人抹殺你嘅嘢。」

敏奕自從公開跟曾國祥拍拖後，已不時傳出她因男友父親曾志偉關係得到工作機會。

去年9年，敏奕簽約「星夢娛樂」，同場有老闆何哲圖及TVB副總經理（戲劇製作及節目） 杜之克。

何哲圖睇中簽「星夢」

13年，敏奕有機會參演《女人俱樂部》，已被指因監製是曾志偉。

提到早前簽約「星夢娛樂」做歌手，敏奕坦言俾何哲圖睇中都感受寵若驚，「咁啱佢同我老闆好多年前係識嘅，佢就問起我音樂呢方面會唔會有興趣？佢就提議做呢件事，過程入面我都好受寵若驚。」不過之前卻有傳何哲圖跟老爺不和，而何哲圖卻跟她合作，敏奕即趁機笑着平反，「所以好明顯，我嘅工作係好獨立㗎啦！哈哈！尤其是我哋做呢行，預到一啲機會，衡量過程會同自己團隊，未必考慮太多嘢，諗自己個人發展方面多啲，因為你自己幾畀心機，幾努力係得你自己知，所以好多嘢都係自己負責番自己嘅嘢。」她解釋連老公曾國祥也少有問意見，「我覺得私人同工作分開番好啲，私底下大家希望有個舒服嘅相處同溝通，唔使有咁多嘢煩，同埋佢又係一個導演唔係management，佢冇辦法用一個management嘅心態同角度，所以我好多時都係同公司傾多過同佢傾工作上嘅嘢。」

29歲的敏奕，外形條件不俗，想玩多幾年仍未想生都好正常。

29歲仍想在事業再搏殺多一段時間的敏奕，跟講求自由的曾國祥亦有共識未打算生B，「我哋呢行時間唔到自己話事，當你想控制時間畀番小朋友同家庭時，你就要放棄工作，同時間未必做到兩樣嘢，所以我都好佩服嗰啲又可以兼顧工作，又兼顧屋企嘅Working Mom，真係好犀利，我見到我啲朋友真係好佩服佢哋，我唔知自己可唔可以咁樣，我會畀好多壓力自己，我係工作同家庭分得好開，所以照顧小朋友我未必想工作。（仲有自己想拍嘅嘢？）起碼自己唔會後悔未盡晒力拍自己想拍嘅嘢。」

曾國祥一直在父親陰影下工作，承受不少壓力。

敏奕預了跟老爺曾志偉關係，在圈中一定有各種是非，只要努力做好自己便足夠。

雖然有打底拍攝，但由於現場有很多工作人員，還有不少船駛過，令怕醜仔羅天宇相當難捱！

由林肯監製、黃秉怡編審的《G-NiiB 微生態配方特約：婚後事》（《Happy Ever After？》），逢周一至五晚九點半翡翠台播映，主要演員包括羅子溢、陳自瑤、黎諾懿、賴慰玲、羅天宇及王敏奕等。

喺同Mira鬥嘴期間，天暉有無啦啦彈出一句有意無意示愛。

不過Mira就算醉咗都只係當佢講笑。

《婚後事》昨晚（14日）播出的第十四集，上半敘述視點是天暉（羅天宇飾），標題是「盡情燃燒 不枉此生」；下半敘述視點是善仁（羅子溢飾），標題是「唯有愛 才令人自覺不枉此生」，兩個都是不枉此生，但不枉此生的原因卻各有不同。天暉自從意識到自己愛著靜海Mira（王敏奕飾）後，一直刻意隱藏愛意，留在Mira身邊默默做「守護天使」，不但在Mira被善仁傷害時充當「垃圾桶」；當Mira決定向韋老闆要求預支編劇費用時，天暉不但全程陪伴，為了成全Mira更賭上整副身家（雖然只有6萬港元）與韋老闆博一鋪！天暉的付出與Mira一樣沒有得到回報，Mira被善仁拋棄後頹廢如泥，看著自暴自棄的Mira天暉心痛不已出盡力鬧醒Mira，二人因而爭執甚至打架，盛怒的Mira更一度想撕爛天暉辛苦贏來的40萬港元支票…原本與Mira鬧翻了的天暉，一次偶然機會下路過昔日與Mira經常聚首的大排檔而再度燃起對Mira的思念…

天暉鼓起勇氣表白，但得到「好假」兩個字。

呢幕30秒對望戲，無論燈光、音樂、演員深情演出，都令成件事勁浪漫。

有邊個估到喺大排檔，都可以發展出咁浪漫嘅粉紅氣泡。

每一集都只讓一至兩名演員集中發揮的《婚後事》，第14集輪到羅天宇接棒。出名怕醜仔的天宇，在劇中一改固有木獨靚仔形象，豁出去飾演傻氣製作人天暉。昨晚天暉最爆笑一幕，是為了幫Mira賭錢壯聲威，慢動作在賭神音樂襯托下霸氣登場；刻意扮型的天暉還來個「阿飛正傳」式梳頭吸睛，可惜梳到一半梳子被kick實，配以走音BGM及天宇無限尷尬的表情，場面爆笑。之後天暉與Mira在賭枱贏大錢後，開心的Mira忘形跳入天暉懷抱送上香吻，天暉即時開心至靈魂出竅，畫面隨即轉往沙灘場景，披滿成身廁紙、手執外賣袋加魚蛋的天暉，開心地瘋狂轉圈兼傻笑；劇組更抵死地以搞笑Emoji遮蓋天暉重要部位，獲網民大讚抵死。相關場口天宇雖然有打底拍攝，但由於現場有很多工作人員，還有不少船駛過，令怕醜仔天宇相當難捱，更笑言自此對沙灘留下極大陰影，認真陰公。不過天宇轉走搞笑路線似乎相當成功，網民近乎一致好評：「幾鍾意馬子仁條線行搞笑」、「羅天宇真係好正」、「成套戲好dark好沉重，特登整番條搞笑線真係好好」、「天暉視角好睇又好笑，有調劑作用」。不過做熱血搞笑製作背後不無代價，其中一幕講述天暉為急著見Mira喪跑的場口，雖然只有約20秒，但原來天宇為了該20秒全速跑了足足10轉300米，加上大熱天時，認真辛苦！

浪漫完即接搞笑位。

浪漫完即接搞笑位。

呢兩位真係好有默契，加埋喜感倍升。

呢一吻，令到天暉想入「飛飛」。

除了搞笑，天宇拍浪漫感情戲亦相當到位。劇集將「大排檔」鎖定為天暉與Mira的長年聚腳點、變相亦成了二人友情甚至愛情的象徵。第14集一開始，「天海CP」又再在大排檔風花雪月，被善仁冷待的Mira借酒澆愁、大吐苦水，其間還發表愛情偉論。眼見Mira愛善仁愛得傻氣又率真，對Mira情感再升溫的天暉決定勇敢表白，除了「撩女仔」Mode上身對Mira口花花，更問Mira：「有冇聽過一個定律，當你定神咁望住一個人超過30秒，就會愛上對方，可唔可以畀我望？」，之後二人在《相依為命》的BGM下深情對望，二人情深的眼神，配以天暉的深情示愛獨白及Mira甜到漏的笑容，浪漫指數爆標；網民亦洗版式大讚二人合襯兼相當有火花，並直指天暉是「阿海男版」。談到與王敏奕第四度合作，天宇坦言二人相當有默契：「我哋拍呢啲Bro戲完全冇難度。當然我現實生活唔會對佢咁粗魯，我哋係大家有需要幫忙就一定會幫嗰啲（朋友）。」談到大排檔場口，雖然觀眾看落二人對視了很久，但原來現場是借位拍攝：「當我真係完全望住敏奕對眼，其實鏡頭take落去會望邊咗，感覺唔係太夠，所以有啲位我係借視線嘅。」

不過係飛奔個飛。

不過係飛奔個飛。

呢串魚蛋，連咗戲架喎。

呢對「戀人未滿」嘅好友，唔單止鬥嘴，仲要互鬧同打埋交。

天暉為咗製作夢任性、Mira為咗愛情夢任性，各有各任性，難怪網民話佢哋天生一對。

雖然呢幕跑戲望就得幾個Shot，但跑到天宇死死吓，條褲就係佢落力嘅證據！

雖然呢幕跑戲望就得幾個Shot，但跑到天宇死死吓，條褲就係佢落力嘅證據！