東京奧運戰況激烈,Kelly好多朋友分秒追看,唔止為各地運動員打氣,仲要搜尋下場上嘅小鮮肉,結果畀佢哋發現咗韓國足球「臉蛋天才」、瑞典撐竿跳小鮮肉、英國靚仔跳水王子,同埋美國肌肉新飛魚。
  二十四歲嘅鄭勝元,靠着帥氣嘅外型,精緻嘅樣貌,吸引不少粉絲熱捧,正效力於韓國大邱FC嘅佢,被稱為「大邱偶像」。鄭勝元除咗有偶像般嘅外表,亦有穩定嘅球技,一九年被選為韓國U-23足球國家代表隊。佢IG都有好多自己喺足球場上嘅靚仔相,完美側臉加上認真嘅眼神,睇佢比賽真係賞心悅目。
  瑞典撐竿跳小鮮肉杜普蘭迪斯(Mondo Duplantis),濃眉大眼,經常笑面迎人,仲有一頭蓬鬆嘅頭髮,完全就喺漫畫花美男。年僅二十一歲嘅佢,出身自運動世家,去年曾經八日內兩次打破世界紀錄。佢周末將會出戰撐竿跳。
  二十七歲嘅英國跳水王子戴利(Tom Daley)擁有超級甜蜜嘅笑容、朱古力腹肌,同埋憑住俊俏的外表,吸引唔少粉絲。佢六歲就開始跳水,噚日喺男子雙人十米跳台跳水奪得金牌。
  美國「新飛魚」德萊賽爾(Caeleb Dressel)身材壯碩,肌肉結實,又有線條感,身高一米九一,仲有璨爛笑容,唔怪得大家話佢似美國隊長。二十四歲嘅佢上屆奧運亦兩次奪金,日前東奧男子4x100米自由泳接力亦與隊友摘金,真喺有顏值又有實力呀!
Kelly Chu