呼籲粉絲勿炒飛 Ian@MIRROR 8月九展開騷

Ian自言都喜歡做家務。

MIRROR成員陳卓賢（Ian）今日出席商場活動，吸引過千Hellosss（粉絲暱稱）到場支持，企滿5層商場。Ian跟幸運粉絲玩遊戲，影合照時，Ian識做地彎腰遷就身形嬌小的女粉絲，當主持問他心目中最喜歡的公主是誰，他選了灰姑娘Cinderella，認為她心地善良和樂觀正面。主持其後叫大家都要像Cinderella回家做家務，Ian即說：「家務我會做。」令一眾Hellosss即時放聲尖叫。

好多粉絲前來支持Ian。

Ian受訪時表示自己是會做家務的人，雖然本身沒有潔癖，但很愛整齊，每次下廚都會整理好再進食。問到其他隊友是否一樣？他指大家都有進步，MIRROR之前一起入營拍節目時，他一知道要和呂爵安（Edan）同房即面有難色，問到Edan是否當中最亂的人？Ian笑說：「我唔評論其他人，可能大家冇呢個習慣，其實他們都唔係大家想像中咁不修邊幅。」

Ian自言都喜歡做家務。

Ian和馮允謙將於8月尾舉行2場音樂會，他笑言場地由麥花臣改到九展特別有親切感，因為MIRROR出道第一個騷正是在九展舉行，又坦言擔心掀炒飛潮，呼籲大家循正常途徑買飛，他說：「好多朋友都問我有冇飛，希望公司可以俾多啲飛我。（會不會再加場？）又冇特別想唔想，時間上比較緊湊，我哋都想俾大家一個有質素嘅音樂會。」

Ian將與馮允謙一齊開騷。

Ian拒評Edan是否當中最亂的人。

不過，今次他不會騷肌，笑謂今次音樂性比較重，他們都有很多歌想玩，問到會不會邀請MIRROR做嘉賓？他笑說：「唔會，但唔知佢哋會唔會嚟睇，隨緣。（女朋友盧慧敏會唔會去支持？）唔知道，大家都係工作為重，最重要係大家都來睇。」

Ian心目中最喜愛的公主是灰姑娘。

前陣子前往英國舉行MIRROR巡唱的陳卓賢Ian，趁空檔時間於倫敦拍攝了最新單曲《Thank You Postman》的MV，當中的情節，正是上一首作品《Lost at first sight》的延續。

陳卓賢（Ian）推出新歌《Thank You Postman》。

《Thank You Postman》由Ian作曲，陳詠謙填詞，是二人繼2020年《正式開始》後再一次合作的作品，歌曲延續了《Lost at first sight》的故事發展，講述一對情侶各自追逐自己的夢想或目標而分隔兩地，但心靈上依然形影不離，連繫一起，並憑藉寫給對方的信件聯繫感情，而郵差為這段感情扮演了重要角色。現在資訊科技發達，Ian現在都不會寫信了，但他回憶道：「我以前有寫過信，但寄就比較少，因為多數親手俾，我唔係一個好擅長用言語去表達自己嘅一個人，所以過去會選擇寫信。」雖然現在機會少了，但問到在英國巡唱時的Ian，若要寄出一封信，他選擇會寄給他的粉絲Hellosss，Ian說：「希望你哋都接收到呢封信，雖然我而家唔喺香港，但都收到你哋對我嘅支持，呢封信係回饋返呢份愛俾你哋。」

相關影片可以按以下畫面觀看：

影片連結：

Ian到英國巡唱趁機拍攝新歌MV。

歌曲延續了《Lost at first sight》的故事發展，講述一對情侶各自追逐自己的夢想或目標而分隔兩地。

因為要到英國開Show，所以Ian出發前忽發奇想，他說：「既然一場嚟到，睇下會唔會安排到少少時間拍到MV一啲片段。今次呢隻歌同MV，係講男仔去咗第二個地方去追佢嘅夢想或者做佢要做嘅嘢，女主角唔係喺同一個地方，各自努力緊自己嘅嘢，其實某程度上大家好多嘢都係同步嘅。」剛好Ian身處英國，扮演女友的許恩怡Natalie在香港，二人各自分開拍攝，香港及倫敦穿插於MV畫面之中，直截了當表達了兩人分隔異地的關係。

Ian身處英國，扮演女友的許恩怡在香港，二人各自分開拍攝，直截了當表達了兩人分隔異地的關係。

由於在英國的行程緊密，Ian當日從香港飛抵倫敦，便立即投入MV拍攝，他坦言都有點吃力，他說：「第一次嚟倫敦，一落機就拍攝，因為Jet lag，都幾辛苦，呢種感覺令我諗返起當日拍攝《正式開始》MV，又係拍完劇就飛通宵機去日本，又係去到機場就即刻開始拍，係好攰，而家喚醒咗當時嘅記憶。」Ian更搞笑道：「唔得喇，好攰！我而家已經想瞓覺。」

難得身處異地，除了拍攝MV外，未知Ian可會在旅程中尋找創作靈感？他說：「又好少去尋找，有陣時係突然有啲嘢出咗嚟，多過主動去尋找。我搭飛機多數唔係好瞓到覺，所以反而係喺飛機上面，我都有寫到一首歌出嚟。」

情歌系列作品第二章。

今年這個音樂系列作品已來到第二章，被問到將會有多少個章節，Ian大賣關子道：「大家要密切留意，即係好似睇一套電影，譬如《哈利波特》，如果一早知道幾多集，就大概知道劇情點樣發展，但我想大家一路追一路期待會好啲。」想知劇情如何發展，大家都要繼續追聽下去了！

Ian欲寫信回饋粉絲愛意。