疫情放緩,Kelly喜歡嘅大型盛事逐一返嚟。好似去年由實體變網上嘅「工展會」,呢個星期五首次移師亞洲國際博覽館舉行,由於亞博展館空間好大,又做足人流管理同空氣清新措施,比以往戶外舉行更加舒適,更加安全,小妹約好朋友入去掃貨。
  廠商會「2021 工展會購物節」本周五起喺亞博館舉行,會方與港鐵合作提供乘車與巴士等優惠,仲免入場費。呢次係工展會三十年來首次喺室內舉行,Kelly覺得仲好,避免日曬雨淋,全場中央冷氣,行極都唔會滿頭大汗。
  今次設有二百五十多個攤位,分五大區域︰休閒食品區、健康養生區、生活家品區、服飾美容區同寵物保健區。廠商會為咗刺激市民消費,多個參展商推出展會限定優惠,有低至一折嘅產品,包括綠之聖食品有限公司推出的十元四個金蟲草祛濕湯包,每日限量二十包。另外聚弘豐國際有限公司亦推出「2.1折」空氣淨化機,原價四千八百八十蚊,特價九百八十八蚊,每日限定三部等。Kelly同朋友都想用花第一期二千蚊電子消費券,工展會就啱晒。
Kelly Chu