澳門立法會選舉日前順利結束,選出26名候任立法會議員。今屆投票率只有42.38%,較上屆低14.84個百分點,是回歸以來新低。廢票有約2000張,較上屆多,白票3000多張。
固然,政治化的評論就歸因於DQ咗反對派的候選人,所以令到投票率低。不過有熟悉澳門情況的人士就分析,有兩個因素影響了澳門的投票率。
第一,外地居民難回澳投票。
在疫情的影響之下,好多攞咗澳門居民身份證、有投票權的外地人,其實都不能返到澳門投票,其中主要係香港人同埋台灣人。估計有幾萬香港人過去曾經在澳門工作或者居住,有咗澳門居民的權利。因為澳門長期派錢,吸引了好多外來入籍居民。
估計單計香港就有數萬人擁有澳門身份證,過去不少人在投票的時候返去投票,但如今就冇呢隻歌仔唱,即使佢地過去會返去,今年都唔會投。台灣亦如是,在台灣有澳門身份證的人,今年也都不能回去投票。
第二個原因係,泛政治化的狀況消退。
過去澳門立法會的選舉由於有激進的泛民參與,例如蘇嘉豪發起好多好激烈的行動,就吸引了一批激進票。今次蘇嘉豪被DQ出局,這些激進的支持者自然就唔會再投票。
高人分析,沒了這些激進票,投票率下降,亦都無問題。因為議會泛政治化並非一個好現象。
以香港為例,平常時期,立法會選舉只有大約50%多一點的投票率,區議會選舉就更低。但2019年區議會選舉,投票率就高達71%,即係有超過20個百分點的選民,係因為社會泛政治化而鼓動出來的投票。當社會回復正常的時候,這些票就會消失。
所以,澳門的投票率下降,並不代表澳門好有問題。高人反而話,冇咗激進人物參與,澳門的政治比較穩定,更加可以集中精力,為澳門未來經濟多元化重新尋找出路。
Ariel
** 博客文章文責自負,不代表本公司立場 **