*

upload_article_image

大戰前夕 形容鍾培生係一隻芝娃娃 林作投訴狂改規則唔俾戴頭盔

全城觸目嘅《培生擂台:無敵盃We Are Champs 2021》明天舉行,決戰前夕,林作和教練向柏榮公開投訴鍾培生不停搬龍門打茅波,就拳手裝備、休息時間等問題,由口頭協議到合約條文改完又改,好混亂,直認會影響到連串針對性策略,尤其突然話唔畀戴頭盔好危險。對此。鍾培生懶得理林作:「冇回應啦!希望大家準時入場睇比賽。」攝影:沈健程 場地:榮拳館
採訪:方騫平
打咗3年拳擊嘅百億富三代鍾培生(Derek),用一百萬酬金嚟迎戰僅學咗半年拳擊嘅林作,兩人未上擂台係咁打口水戰。最新有鍾培生在fb出post:「林作,早晨,有冇興趣加碼?如果我K.O.咗你,扣30萬出場費。如果K.O.唔到,畀多1,000,000你。」不過林作只係回佢PM詳談,大戰前選擇同女友裕美去遊船河輕鬆吓。
操肌展現老鼠仔
  本周一,林作去拳館作最後衝刺,除咗踩上擂台同向師傅對打外,仲用兇狠凌厲嘅眼神狂打沙包發洩,更喃喃自語說:「鍾培生…神龍擺尾吖嘞!(鍾培生拳手綽號係Almighty Dragon)」林作體重由67kg增磅到75kg,肌肉變得結實,狀態大勇,展現「老鼠仔」嘅佢話,「最唔明鍾培生話我搞好多小動作,意圖嚟影響佢,其實我線上線下都係咁,我睥住佢都係好正常啫,唔通迴避你嘅眼神咩!咁佢雙手插袋、扁嘴之類我都可以解讀佢緊張同埋恰我!」
不滿係咁改賽制
  鍾培生話林作有好多小動作,後者就提出3點反控訴Derek三番四次改賽制:「由口頭承諾到簽約,喺8月30日及上周3(9月8日)仲不停喺度改緊,最重要口頭話可以戴頭盔,後來以畫面劃一為理由唔准戴;休息時間由兩分鐘變回一分鐘;第三點要提問,究竟今次係專業賽定表演賽?又講得唔清楚,如果係專業賽,點解就連拳套都唔符合專業賽拳手裝備?而我好肯定當日簽嗰份合約係業餘比賽合約,但當時冇列明細則。」教練補充說:「雖然喺奧運成人男子組比賽都棄用頭盔,但兒童組、青少年及女子組都會戴,咁鍾培生口中嘅林作係Girl friend(女人),點解唔喺安全情況下畀林作打足4個回合?有頭盔保護好啲,打拳擊出現過頭撼頭,萬一有意外受傷,對鍾培生搞嘅event都唔好啦!另隨行團隊人數上都變嚟變去,o依家話連埋我只可有3人,感覺龍門任搬安排有少少混亂,影響到我幫林作嘅策略性安排,唔戴頭盔又有另一種打法!反而佢係一張白紙,對佢冇影響,好講佢臨場發揮。」
笑Derek壓力大
  雖然係咁改遊戲規則但林作嬉皮笑臉話唔擔心:「可能佢搞拳賽好辛苦,精神壓力愈嚟愈大,我見佢呢幾個月嘅氣場愈嚟愈差,可能因為咁要改規則嚟保護自己多啲!我有好多招數乜都搞得掂!」林作形容鍾培生係隻芝娃娃(狗),他係狗主:「如果佢聽話就唔使搞咁多嘢,但佢吠同咬人就要教訓佢嘞!」

- 閱讀更多 -

往下看更多文章