*

老公做攝影師 張嘉兒碩士畢業禮致詞

張嘉兒9月跟金融才俊Nathan在加拿大結婚,而花咗兩年時間在香港中文大學苦讀的公共衞生碩士(兼讀制)課程亦完成,喜事齊來的靚人妻上周畢業,着住畢業袍的張嘉兒在老公、胞姐同老友戚黛黛見證下於香港中文大學醫學院行畢業禮。

 

張嘉兒拍劇同時,以兩年兼讀制形式完成公共衞生碩士課程,在畢業典禮大日子,老公Nathan就特地請半日假現身撐場,身兼阿四、攝影師、粉絲、24孝老公等多個角色,而老死戚黛黛送上畢業公仔做賀禮。

 

 

嘉兒當日被推選為畢業生代表上台致詞。同當年參選港姐一樣,張嘉兒笑容滿面,自信十足以一口流利英語叫大家感恩,要學以致用做一顆有果實的樹去影響他人!

 

 

畢業禮於傍晚6點半舉行,張嘉兒同當年選美一樣戰戰兢兢,但自信的笑容特別靚,成個look都sharp醒晒。嘉兒上台領畢業證書前先由職員為她整理好頭頂的四方帽,確保畢業袍着得整整齊齊。行禮時嘉兒不時望向「攝影師」老公,Nathan就唔敢怠慢狂影相,兩公婆好有默契。

 

 

她笑說:「老公成日叫我學以致用諗吓可以做乜,交咗咁多學費睇吓點樣搵番,我諗我會做義工增加相關嘅工作經驗,唔排除到中國山區做研究,如傷口處理等。至於演藝事業係會繼續同步,我冇打算放棄。」張嘉兒亦無意讀埋博士,升任做媽咪更加係計劃以外。

 

對於蔡思貝「極速」做學士,張嘉兒坦言咁後生讀多啲書係好事,正如台上致詞時都有講:「不停學習、學習,認識更多會讓我們更自信!」不過,有學歷唔確保係有好嘅事業,人與人之間,溝通更加重要。

 

 

至於Nathan成晚對住老婆甜笑,滿足到不得了。他笑說:「老婆好叻係完美人妻!其實佢做乜我都會支持佢!見佢畢業我好感動,因為佢終於有時間陪我去旅行啦。」在旁的嘉兒搶住補充道:「你唔係應該答,只要我開心就得咩?」兩公婆sweet到爆。