「獅子山」帶嚟八號風球兼黑雨,狂風暴雨過後,原本喺華富邨海岸嘅瀑布灣突然改變咗面貌,由一條小瀑布變成袖珍版嘅「尼加拉瓜」大瀑布,睇到嘅人不禁「嘩嘩嘩」大叫。
  香港市區嘅瀑布唔多,其中一條喺港島南區嘅瀑布灣公園之內,長年流水淙淙,鄰近華富邨、貝沙灣等住宅屋苑,簡單易去,可以講係隱世景點。有傳呢條瀑布喺幾十年前好壯觀,水量頗大,但隨着附近發展住宅,水流可能受阻,變得愈來愈少水,更有經常遊覽嘅人話,瀑布灣應改名為「小溪灣」,可見城市發展對自然景觀嘅嚴重影響。
  但「獅子山」襲港帶來黑雨,瀑布灣水量大增,呢幾日變身成大瀑布,雖然只有十五呎高,但寬度加大,白茫茫嘅大水瀉下,真係幾壯觀。唔講唔知,呢條水源來自薄扶林水塘嘅瀑布,曾經有「鼇洋飛瀑」同「扶林飛瀑」嘅美譽,被喻為「新安八景」和「香港八景」之一,可想像當年瀑布傾瀉而下的水流有多麼澎湃!現在靠「獅子山」之助,瀑布灣得以回復昔日嘅雄風。
Kelly Chu