10月20日，天晴，氣溫又略為回升，留意周末氣溫價顯著下降。雖然通脹壓力未減，市場亦開始接受通脹持續，而供應鏈嘅瓶頸問題或令通脹問題惡化，但美股隔晚一於少理，三大指數繼續上升。支持美股繼續向上嘅企業普遍交出強勁季度業績，消除市場對業盈利嘅憂慮。企業盈利表現理想之餘，亦有公司上調全年業績指引，帶動股價向上。


不過繼續有分析指美股將面臨巨大挑戰，包括貨幣供應過剩及通脹上升嘅困局，泡沫終有一天會爆破。不過美股暫時維持強勢，依家去預測幾時爆煲，只會一再錯過美股嘅升浪，有智慧不如趁勢，總之美股一日未轉勢，暫時去估頂都屬不智行為。


至於港股暫時仍然做好，主要係內地監管消息方面略為改善，包括國務院表態支持職業教育發展、人行預計在樓價穩定後抵押貸款將恢復正常，投資氣氛略略好轉。不過港股呢一段升市，成交一直未能配合，北水買入力度唔算強，而中國第三季經濟增長遜預期，惟人行似乎未有打算降準刺激經濟。至於外圍方面，各地央行立場偏鷹，市場預計英國央行最快將於11月加息，環球債息抽升，利淡股市表現。預計港股於26000點漸見阻力。


預計港股升抵26000水平，殺盡熊證重貨區後，將於現水平略為調整或整固，不過只要恒指能穩守於50日線( 25389)之上，市底已轉強，但大市要進一步挑戰100日線( 26692)水平，則需要有較利好消息及成交增加配合。暫時未直過份樂觀，只能摸石過河，跟隨資金於不同板塊炒作，並以短線操作為主。


古天后


(徐狄怡，證監會持牌人)