香港運動員喺東京奧運取得佳績,一班殘疾運動員其實都喺殘奧會好拼搏,發揮「香港精神」令人振奮。香港郵政將於十二月九日發行以「祝賀中國香港代表團在東京二○二○殘疾人奧運會取得卓越成績」為題嘅郵票小型張及相關郵品,Kelly覺得撐運動員嘅粉絲都會留意。
  為慶祝香港代表團攞到兩面銀牌及三面銅牌,郵票小型張上嵌有一套三枚嘅郵票,分別展示羽毛球、硬地滾球及乒乓球三個項目,並印上得獎健兒嘅肖像。好似攞到銅牌嘅輪椅羽毛球好手陳浩源,奮鬥故事都好感人,佢攞獎時講「我唔係神奇小子,但佢係我嘅神奇媽媽。」便教人難忘。王婷莛喺乒乓球贏得銅牌,梁育榮喺硬地滾球贏得銅牌,之後同隊友劉慧茵及黃君恒合力贏得混合賽銀牌,市民即日起可預訂啦!
Kelly Chu