*

復活節1億金多寶好吸引 三日內跑兩次馬可改進

復活節假期,留港的中環人無股可買,唔少人竟然去了買六合彩。上周六開獎的一期若一注獨得,彩金高達1億,搞到離港渡假的中環老友,都托尚風買200元,越洋買個夢。

馬會

1億彩金實在太吸引。

結果頭獎只有半注中,派出的獎金仍有5600萬元。餘下5600萬元撥入下期,馬會估計若下期投注者一注獨中,可獲7,000萬元獎金,發財夢又可延續。由於再有巨額獎金,馬會順延下期攪珠至本周四(4月25日)晚,讓市民有更多間落注,這真是一個德政。若然馬會再搞激啲,學一學外國的彩票,頭獎最高派10億、8億彩金,恐怕全城也瘋狂,投注額一定大超標,最後馬會仍然有羸無輸。

講開賭,中環人真係瓣瓣啱,金融圈好多人是馬主,馬迷,亦同時是標準球迷,茶餘飯後,總有話題,亦喜歡下注,有些人小注怡情,有些卻是以專業態度,專心鑽研,期望投注贏,成功掘草皮。

尚風亦是波馬皆宜,上週三跑完馬後,晚上先睇歐聯,隔晚再睇歐霸,週六早上去西貢滘西洲馬會的高爾夫球場,先掘草皮,晚上再睇英超,然後最好是週日睇跑馬,時間表非常充實,不亦樂乎!

不過馬會過去咁多年,一季總有安排係三日之內跑兩次馬。馬圈中人包括騎練、評馬人及要做功課的馬迷,都有少少意見。尚風估計,馬會希望將賽事編在長假期的最後一天,亦即本星期一,讓更多人可以趕及回港入場,背後有其道理。

不過標準馬迷和評馬人,就疲於奔命。周一跑完,周三又有賽事,真正有心買大注的馬迷,必會做足功課,包括睇晨操、巡邏影片、研究騎練形勢、模擬馬匹走位、研究值博率及場地偏差,才會放心下注。三日內跑兩日馬,做功課就有困難。如果可以的話,都係避一避這種頻密賽事好一點。

尚風

** 博客文章文責自負,不代表本公司立場 **