*

upload_article_image

朋友勸帶眼識人 姚子羚盼付出真心覓真愛

子羚加油!

子羚表示感情事一向隨緣。

38歲的姚子羚(Elaine)在TVB新劇《包青天再起風雲》中擔正,飾演亦正亦邪的「紀念念」,同「雲千羽」胡定欣係好姊妹,「包拯」譚俊彥用大紅花轎迎娶的夫人,惜有緣無份。現實中Elaine情路亦相當坎呵,今年5月流出的「牀照」兼被指搭上花弗人夫Raymond,甚至搶好友Sarika(蔡宛珊)老公。痛定思痛的姚子羚坦言:「只要願意付出真心,人哋唔領情咪算囉。」

姚子羚情路坎呵,不過她說只是緣份未到。

姚子羚在《包青天再起風雲》中用心演出,劇情後段被踢爆細作身份有好大發揮:「啱啱出街嗰幕胡定欣同我反目對打戲,我要吊起打後空翻,因為條腰舊患,戰戰兢兢下完成,打到手腳都瘀晒,好深刻。另外,後段好多喊爆嘅情感戲,其中成親戲同譚俊彥淚鬥淚,由於轉機位,keep住情緒幾粒鐘,原來譚俊彥係TVB數一數二最喊得男演員,佢好似開水喉咁,喊極都有,我唔可以比下去。除咗佢,陳展鵬都喊得,好快眼都紅晒。」子羚承認,之前的《包青天》版本太深入民心,要打破傳統唔容易,不過,她反而欣賞某啲新嘢:「好似包大人模擬兇手點殺人,仲加入感情線,都幾得意。」

「胡說八道」好姊妹及身邊老友都撐她。

當日的桃色風波,問子羚有否擔心累到《包青天》要存倉?她輕鬆說:「當日我冇諗咁多,不過,除咗出呢套劇,仲拍緊新劇《大步走》,證明公司係相信我。人生會遇到好多難題,跳出去睇,原來係有得着,發覺喺人生裏面有好多人錫我,好似監製文偉鴻同埋『胡說八道』好姊妹等。」子羚強調自己係一個低調務實嘅人,一向行最踏實嘅路,從來冇諗過桃色新聞會發生在她身上,「呢件係唔開心嘅事,既然發生咪面對囉,冇乜嘢唔可以面對,而且冇去傷害人,過程上係有人想傷害我,但亦有好多人係好錫我,呢啲人生經歷唔係一定唔好,可能得到嘅比失去嘅更多。」

姚子羚真情剖白,無懼再談舊愛Raymond。(東周刊圖片)

至於會否提醒自己以後帶眼識人?子羚答得認真:「好多人都問過我,我反而想問點樣叫唔帶眼識人呢?我只會覺得,做情侶或交朋友,大家都要攞個心出嚟,吓吓抱懷疑態度,除咗攰,咁樣交往會變惡性循環,一段關係好難建立,兩個人總要有付出,咪唔好怕蝕底,做乜都好,只要願意付出真心,人哋係會知嘅,如果付出真心,人哋唔領情咪算囉,講真吖,對方有心隱瞞總有方法。」至於搶好友老公的報道,子羚表示,「報章寫嘅只係事實嘅一部份,唔想再解釋,只要當事人知就得。」至於有否再同Raymond聯絡?她說,「已少聯絡,只係朋友關係。」

姚子羚同譚俊彥有好多感情戲,多得對方感情豐富而變成喊包。

同陳山聰擔正拍新劇《大步走》,證明公司絕對相信姚子羚。(東星圖片)