*

upload_article_image

為顧客提供心靈輔導 鄭子邦開解憂咖啡店

現代人的確好需要一個治療心靈的地方!

擁有過百部的士的車行老闆鄭子邦,近日忽然踩過界,與心靈治療師好友,在觀塘工廈投資開設心靈工作坊兼咖啡店「Crazy Monkey Cafe」,開設講座或課程助人治療心病,提升正能量。開幕當日,「兄弟幫」好友包括方力申、趙式浩、王大業和丁子高等率先撐場。

Cafe開幕當天,好友丁子高、歐陽妙芝、洪華、Sunny Wong、侯維德等,都有來捧場。(《東周刊》圖片)

鄭子邦說:「我正職係做的士生意,開呢間cafe唔係為賺錢,喺香港有人會教你去邊度飲飲食食,但當個心有事,就無乜人可以教到你點做。好多人都好抗拒睇精神科醫生,但上嚟呢度,飲杯咖啡傾下偈,會容易接受好多。呢家社會好多負面情緒,希望呢度可以幫助人解開心裏面嘅鬱結,內心得到平靜,面上有番笑容,幫到人,自己都開心。」

鄭子邦眼見都市人快樂指數愈來愈低,故開設心靈工作坊,希望可以幫人找到快樂,「我叫人打坐,人哋會話我黐線;但如果上來cafe食件蛋批、飲杯咖啡,放下手機停一停,哪怕是一分鐘,離開時已經可放低一啲煩惱。」(《東周刊》圖片)

據《東周刊》報道,鄭子邦和好友創辦的心靈工作坊,位於觀塘的工廠大廈內,外觀平平無奇,且頗為隱蔽,但推門而進,卻發現內裏別有洞天。工作坊面積約有一千五百呎,裝潢充滿禪味,場內播放着輕音樂,牆上以投影器放映着繁星、海洋、草原、火焰等大自然的景象。內裏闢了一隅作咖啡店,提供咖啡、茶和精緻素食等。

茹素超過十年的他,堅持食長齋不殺生,「媽咪信佛食齋,從來都唔殺生。十多年前,有次見佢為我煮雞翼,個樣好辛苦,原來佢覺得殺生好殘忍,之後我就開始跟佢食素,慢慢成為習慣。我都希望可以感染多啲人食素,所以我好堅守呢度嘅食物一定要係素食,愛係要行動,唔係單單用口講,希望可以延續落去。」

2014年到印度上禪修班,順道遊覽寺廟,為眾生點燈祈福。 (《東周刊》圖片)

鄭子邦早前和中學同學兼死黨Jeffrey分享人生課題,眼見大家身邊的朋友,都有着不同的情緒問題,所以希望可以開設一間工作坊,為大家提供心靈輔導。鄭子邦說:「我喺家庭同工作上,都曾經歷過生離死別,有時都會問:『做人點解要有啲咁唔開心嘅經歷?』所以有段時間我去咗學打坐,領悟咩叫人生。我都就快四十歲,朋友之間開始唔再講飲講食,大家會講吓生活。我同Jeffrey係同學,佢亦係一位經驗好豐富嘅心靈導師。有次我哋去飲嘢傾偈,我話不如試下開個studio啦,大家一拍即合。我哋會定期開設有關心靈上嘅講座和輔導班,有免費,亦有由數百至萬多元嘅收費證書課程,供有需要嘅朋友選擇。」

他與Jeffrey是中學同學,對方是心靈治療師,二人合資開辦心靈工作坊,希望為人帶來正能量。(《東周刊》圖片)

為「拯救」人心,他不求回報,斥資逾百萬打造這所工作坊,「我認為創辦一個行業嘅出發點同理念係好嘅,哪怕賺唔賺到錢,我當然希望呢個studio做得好啲,只要夠交租已經好開心。我本身有其他業務,但有時為搵食都會好攰,做人除咗金錢,其實心靈上嘅富足更重要,每次見到嚟呢度嘅人,可以開開心心咁走,嗰種喜悅用錢都買唔到。」工作坊取名「Crazy Monkey」,意思是每人內心都有一隻瘋猴子,「當思緒混亂不定嘅時候,人嘅心態好重要,情緒好心態就會好。」

更多娛樂消息,請看東周網:https://eastweek.my-magazine.me/main/entertainment