*

upload_article_image

「神算師」認真揀銀包 王梓軒隨身成疊500蚊

買銀包都要試過

王梓軒下個月就會開入行十周年演唱會,呢期當然忙做Gym,因為男歌手開親Show都話要騷肌。不過日前《頭條日報》見到梓軒未算好大隻,見佢一支公去咗Porter(日本品牌)揀銀包,為試真啲銀包嘅袋錢量,佢將自己銀包嗰疊500蚊放落去新銀包,再秤吓再望吓再諗吓,裝得落就入手,眾所周知梓軒有名「神算軒」,經佢計過度過一定無問題。

梓軒試斜孭袋,仲放埋手提電話入去試。

今時今日好多人都用電子錢包,但好富貴嘅梓軒仍然選擇袋一疊錢出街。

梓軒開Show未透露請咗邊個做嘉賓,但就講定演唱會會提早喺晚上7時15分開始,問到係咪遷就交通?佢承認,「希望觀眾開心及安全嚟睇騷。」再問會否擔心取消?佢就話其中一名投資者曾幫周杰倫搞演唱會,「佢叫我唔使擔心,到時會安排穿梭巴士接送觀眾。」如果會展附近變「仙境」呢?投資者幫Michael Jackson搞過演唱會都無用啦。

梓軒揀咗成粒鐘,揀咗好多嘢。

一個人Shopping嘅梓軒買得好開心。

當日傍晚6點,戴住金絲眼鏡同穿恤衫嘅王梓軒去銅鑼灣百德新街買銀包,梓軒咩款都望吓,會將信用咭之類嘅東西或一疊500蚊放入新銀包睇吓,見到裝得落唔太脹,入手唔使諗,之後再試斜孭袋,孭上身照吓鏡,個樣好滿足,揀足一粒鐘,梓軒笑笑口離開。

孭住斜孭袋嘅梓軒係咁照鏡。

買完嘢,梓軒見到記者揮手Say Bye。