*

upload_article_image

C君娶拍拖5年女友黃天頤 兄弟團大妗姐鬥搶鏡

C君今日做老襯,恭喜恭喜!

農夫成員C君(鄭詩君)今日迎娶拍拖5年的港台DJ女友黃天頤,並於晚上在中環四季酒店擺酒。今日下午,穿上傳統馬褂的C君則浩浩蕩蕩,與一眾星級兄弟團到酒店接新娘,當中包括陸永、蕭正楠(Edwin)、黃翠如、洪永城等,而好友唐詩詠就充當大妗姐一角。

農夫成員C君今日同拍拖5年的港台DJ女友黃天頤結婚了!

甫到達新娘房時,兄弟團第一時間付上開門利是,其間姊妹們一度提出9990萬的銀碼,C君一聽到即抵死笑道:「呢個數李嘉誠都娶唔到老婆啦!」身旁的Edwin即向各兄弟「眾酬」,陸永突然高呼:「嘩!真係厚到利是封都擺唔落呀!」原來他們「作弊」用銀紙包住一包紙巾,結果被姊妹們發現即起哄,Edwin打趣道:「黃翠如得入面嗰包咋!」最終,C君以一封「開心大利是」順利過關。

着到紅噹噹的唐詩詠(左)充當大妗姐一角。

到玩新郎環節,C君與兄弟團先穿上美少女戰士服,模仿美少女戰士變身,其後他再戴上眼罩口含唇膏,為兄弟塗上「大Red唇」,然後兄弟們嘴貼嘴傳一塊心心透明膠片,見Edwin與洪永城最得如此肉緊,真係有點令人打了冷震!最後,兄弟又「零距離」向住瞓在地上的C君,一邊口含威化餅一邊做掌上壓,仲要每做9吓便說出一句恭賀說話,搞到C君被噴到一面餅碎!

玩新郎環節,C君蒙眼幫兄弟洪永城塗紅唇膏。

順利過關後,C君便宣讀自己所寫的「愛的誓言」,他表示:「天頤婚前一直都唔畀我叫老婆、太太,就算有人叫佢做C君老婆,佢都第一時間否認,強調只係我女朋友。不過,過咗今日可以每日叫你老婆啦!一直以嚟好多新人都係讀愛的宣言,但係宣言係可以改或者唔算數,我自己度咗一段愛的誓言,如果做唔到就天打雷劈。」天頤聽到老公夾雜文言文的誓言既感動又開心,惟一對新人非常含蓄,新郎哥只輕錫老婆面頰一下。此外,擔任大妗姐的詩詠可能未背熟台詞,出現食螺絲的情況,場面爆笑。

蕭正楠同洪永城嘴貼嘴傳心心透明膠片,黃翠如在側邊看得好開心!

兄弟們一邊口含威化餅,一邊向住瞓在地上的C君做掌上壓!

一對新人影番張Selfie紀念一下先!